Vice gov ng Negros Occ. at anak niyang mayor, lusot sa asunto sa pagkamatay ng isang hukom

Ibinasura ng Justice of Department (DOJ) ang reklamong murder laban kay Negros Occidental Vice Governor Genaro Alvarez at sa kanyang anak na alkalde kaugnay sa pagpatay sa regional trial court judge noong Abril 2012.   Sa resolusyong pinirmahan ni Prosecutor General Claro Arellano,  sinabing walang nakitang batayan ang DOJ upang iakyat sa korte ang kaso laban kina Alvarez at sa anak nitong si Ilog Mayor John Paul.   Ang kaso ay kaugnay sa pagpatay kay Judge Henry Arles ng Regional Trial Court Branch 61 sa Kabankalan City noong nakaraang taon.   Ibinasura na rin ang reklamo laban kay Cauayan Vice Mayor Jerry Tabujara.   “With respect to the alleged participation of respondents Mayor Alvarez, Vice Gov. Alvarez and Vice Mayor Jerry Tabujara, there is not enough proof  to establish prima facie evidence for their indictment. The testimony of one witness was not corroborated by other witnesses,” nakasaad sa resolusyon ng DOJ.   Idinagdag sa resoluyson na nabigong patunayan ng kampo ng biktima na mayroong sabwatan sa pagkamatay ng hukom.   Tumatakbo ngayong halalan sa pagka-gobernador ang nakatatandang Alvarez, habang posisyon ng bise alkalde ng Ilog ang hinahabol ng nakababatang Alvarez.   Ikinalungkot naman ng kampo ng nasawing hukom ang desisyon ng DOJ.   "The timing of the release of the resolution a week before the elections is also highly suspect," ayon sa anak ng biktimang si Ria Arles.   "Did the DOJ prosecutors who are duty-bound to aid the victims of injustice allow themselves to be influenced and used by those in power to help these politicians win in the elections?" dagdag niya.   Samantala, sinabi naman ni Court Administrator Midas Marquez na umaasa siyang "isolated case" ang pagbabasura ng kaso.   "It is distressing to know that after over a year of legal proceedings, the masterminds have not been brought to justice and remain scot-free," ani Marquez.  "If a highly reputed and distinguished judge cannot get justice from our system, then who can?"   Abril 24, 2012 nang tambangan at pagbabarilin ng mga armadong lalaki si Arles habang nagmamaneho pauwi sa bayan ng Ilog.   Naaresto ng NBI ang tatlong suspek na sina Eddie Fortunado, Jessie Daguia at Alejandro Capunong, mga miyembro ng Revolutionary Proletarian Army, noong Hunyo dahil sa kasong illegal possession of firearms.   Sa tatlong inarestong suspek, si Fortunado lamang ang nagturo kay Mayor Alvarez bilang mastermind sa pagpatay. - Mandy Fernandez/FRJ, GMA News