PNoy, tumungo sa Myanmar para sa World Economic Forum

Lumipad si Pangulong Benigno Aquino III nitong Biyernes patungong Myanmar para dumalo sa 22nd World Economic Forum East Asia summit.

Nagbigay ang Philippine Air Force ng departure honors kay Aquino bago sumakay sa isang Philippine Airlines flight, ayon sa ulat ni Sam Nielsen ng dzBB.

Kasama ni Aquino sa biyahe sina:

Ang ibang opisyales na nauna nang pumunta sa Myanmar ay sina Tourism Secretary Ramon Jimenez, Trade Secretary Cesar Purisima, at Presidential Communications Development and Strategic Planning Office Secretary Ramon Carandang.

Kasamang naghatid sa Pangulo sa paliparan sina Justice Secretary Leila de Lima, Public Works Secretary Rogelio Singson, presidential peace process adviser Teresita Deles, Philippine National Police chief Director General Alan Purisima, and Metropolitan Manila Development Authority chairman Francis Tolentino.

Sa kanyang departure statement, tiniyak ni Aquino na patuloy na palalakasin ng bansa ang ugnayan nito sa mga karatig-bansa upang mapabuti lalo ang kooperasyon sa pagitan ng mga ito.

Susubukan din ng bansa na makakuha ng ilang mga tuntunin kung paano mangasiwa ng WEF on East Asia dahil sa Pilipinas gagawin ang summit sa 2014.

Sisikapin ni Aquino na makikipagpulong sa lider ng oposisyon sa Myanmar na si Aung San Suu Kyi. Makikipagpulong rin siya sa mga negosyante, dagdag ng ulat.

Pagdating niya sa Myanmar, agad na makikipagpulong si Aquino kay Myanmar President Thein Sein sa isang bilateral meeting.

Makikipagkita rin siya kay WEF Founder at Executive Chairman Klaus Schwab.

Sasamahan din ni Aquino ang mga CEO at negosyante sa isang pananghalian na inihahanda ng Ayala Corporation, bago dumalo sa isang closing plenary ng WEF East Asia Summit. — JGV /LBG, GMA News