Pagpatay sa mga Sarmiento may testigo na

Dunay nay mobarog nga testigo nga giingong nakasaksi sa pagpusil patay kang mayoral candidate Isidro Sarmiento ug sa anak niini sa Malita, Davao del Sur. Matud sa mga otoridad, daghang anggulo ang migawas sa pagpatay kang Isidro ug ang anak niining si Danny, diha mismo sa gawas sa ilang balay sa Abbas Street, Poblacion, Malita. Dili tiaw ang mga samad pinusilan nga naangkon sa duha, hinungdan sa ilang kamatayon. Bisan ang mga pulis nga niresponde walay masulti. Wala na silay naabtan sa nahitabuan gawas lamang sa mga patayng lawas sa mga biktima. Sa blotter sa Malita Police, migawas nga misulong si Congressman Claude Bautista kauban ang lima ka bodyguards sa blay sa mga Sarmiento. Apan gi-unahan kuno ang grupo ni Bautista pagpusil hinungdan nga mibalos kini. Pagkadungog sa buto sa pusil, giingong nigawas sa balay ang amahang Sarmiento. Nahimo pa kuno niining mamusil, gani nasamdan pa ang usa sa bodyguard ni Bautista. Na-recover sa mga operatiba ang pipila ka basiyo sa .45 caliber pistol, mga buhing bala ug usa ka super .38 caliber pistol diha kuno kilid sa patayng lawas ni Isidro. Pagkuha sa ERs Gikatahong pagpanguha sa election returns (ERs) sa pamilya ni Sarmiento ang hinungdan sa pag-alburoto sa kampo sa mga Bautista. Dayag sa tanan sa Malita nga suod nga managhigala ang pamilya Bautista ug Sarmiento. Halos dili makatuo ang kadaghanan sa nahitabo. Nagkabulag lamang ang duha ka pamilya karong eleksyon tungod kay magka-kontra partido na sila. Ang namatay nga si Isidro nagpapili pagka-mayor sa lungsod ug kaatbang niini ang kasamtangang gobernador nga si Benjamin Bautista. Sa gipahigayong canvassing sulod sa munisipyo, milya-milya ang biya ni Sarmiento. Bisan sa pagka-gobernador nag-una usab si Claude Bautista kang Congressman Cagas. Giingong natingala ang pamilya Sarmiento dihang masuk-anong nibutho si Claude sa balay sa mga Sarmiento. Gikasuk-an ni Bautista ang impormasyong adunay nanguha ug ERs sa canvassing ug didto kini gitago sa balay ni sarmiento. Apan giklaro sa Lakas-CMD nga natural lamang nga kuhaon nila ang Fourth Copy sa ERs tungod kay sila ang dominant party ug alang kanila ang nahisgutang ERs. Gipahigayon na sa mga sakop sa National Bureau of Investigation Region 11 (NBI-11) ang imbestigasyon sa kaso samtang gipailawom na sa witness protection program ang nag-inusarang testigo sa duguong hitabo. Gipagula na usab sa NBI 11 ang report sa autopsy sa mga biktima. Migawas nga si Danny nakahiagom ug lima ka samad pinusilan sa lawas. Tanang entrada gikan sa likod. Samtang ang amahan niini nga si Isidro, nakahiagom og upat ka samad pinusilan. Tanan kunong samad agi sa .45 kalibre nga pistola. Taskforce Sarmiento Gimugna na sa Philippine National Police Region 11 ang Taskforce Sarmiento nga maoy mo-imbestiga sa kaso. Gibutyag ni Police Chief Supt. Andres Caro II, regional director sa PNP rehiyon, nga mag-tambayayong ang Criminal Investigation and Detection Group, NBI ug PNP sa pag-imbestiga sa kaso, apan ang CIDG maoy manguna sa imbestigasyon. Gikumpirma ni General Caro nga ibalhin na ang canvassing sa mga boto gikan sa Malita ngadto sa Digos. Nanawagan usab si Caro sa mga kandidato ug mga supporters nga magmakalmahon lamang ug hulaton ang resulta sa eleksyon. - Testigo