1 patay sa magsuon nga gipamusil sa Panabo City

Usa ang patay sa magsuong trabahante nga gipamusil sa mga armadong nakamotorsiklo sa Panabo City, Davao del Norte, buntag sa Huwebes. Matod sa survivor nga si Jerome Loreche, 29, duha ka lalaking nakamotorsiklo namusil kanila samtang padulong sila sa trabaho. Tulo ka samad pinusilan ang nahiaguman ni Jerome samtang ang iyang manghud nga si Polinar, 23, kinsa iyang angkas sa gimanehong motorsiklo, dead on the spot. Ang mangsuon parehong trabahante sa Mindanao Integrated Logistics Services, Inc. (MILSI) sa Panabo City. Anaa pa sa hospital si Jerome, diin iyang gisaysay nga wala gyud kuno silay atraso kang bisan kinsa. Gidudahang mga trabahante sa MILSI ang namusil sa duha, matod sa mga operatiba sa Panabo Police. Ang pagpamusil sa magsuong Loreche maoy ikatulong kaso sa pangluthang sa mga empleyado sa MILSI karong tuiga. Unang biktima si Venus Maquiran, sekretarya sa kumpanya, ug sunod ang operations manager nga si Claudio Mala, dayon ang managsuon karong adlawa. Matud ni Panabo PNP chief P/C Insp. Reymundo Lozano, nailhan na kuno nila ang usa sa mga suspek sa pagpusil-patay kang Maquiran, trabahante usab sa MILSI. Padayon pang gipangita ang suspek nga si Gavino Bansalan human nigawas ang arrest warrant batok niini. Sumala kang Lozano, padayon pa nilang gitun-an ang anggulo sa posibleng kalambigitan sa suspek sa pagpamusil sa managsuon. Base sa pahayag sa mga paryente sa mga biktima, aduna kunoy anomaliya sulod sa maong kumpanya diin pipila ang giingong miyembro sa “sindikato" sulod sa kumpanya. Sa matag deliver og asukal, ginakuhaan kuno kini’g usa ka gatus ka kilo sa pipila ka mga trabahante. Gipaningkamutan sa GMA Testigo nga makuhaan og pahayag ang management sa MILSI, apan pakyas kini. - Testigo