10 kumpirmadong patay sa Comval landslide

Niabot sa 10 karong Martes ang ihap sa mga namatay sa landslide sa barangay Masara, Maco, Compostela Valley. Ginaplano karon sa mga opisyal sa barangay masara nga did-an una sa pagbalik sa lugar ang mga residente nga apektado sa landslide. Sumala ni barangay kagawad Estela Sanchez, ikatulo na ka higayon nga nahitabo ang landslide sa lugar, apan karon ang pinakagrabe gumikan kay dunay mga namatay. Temporaryo nga gihiklin sa barangay hall ang napulo ka apektadong mga pamilya. Siyam na karon ang mga kumpirmadong patay, ang mga biktima mao sila si Avelino Cayetano 46, Geraldin Cayetano 17, Romavie Cayetano, 4, usa ka nailhan lang nga Patria, Annie Carreon 33, Aiza Carreon 9, Loey Carreon 3, Angelito Carreon Jr., 5, ug si Marissa Par 34. Gipangita pa ang patayng lawas ni Julmer Cariaga nga matud sa iyang inahan naatlan sa pagdahili sa yuta didto sa sulod sa ilang balay. Kasagaran sa mga biktima ang ana-a sulod sa ilang panimalay sa dihang nahitabo ang landslide. Gipadayon gihapon ang search and rescue operation bisan sa kangitngit ug bisan ug nawad-an na’g paglaum ang kabanay sa natabunang mga biktima. Sumala ni Renato Basanez, provincial health officer sa Compostela Valley province, dili sila muhunong hangtod dili makuha ang mga nangawala. Naguol si Elizabeth Cariaga sa kahimtang sa iyang anak nga si Julmer 13. Sumala kaniya, bag-o nahitabo ang landslide mi-uli ang iyang anak sa ilang panimalay aron mag-CR ug didto gayod kini naabtan sa nidahili nga yuta. Samtang ang pamilya ni Marissa Par, pugos nga gidawat ang mamahimong kapalaran sa biktima. Matud sa iyang anak, nagluto kuno kini sulod sa ilang panimalay dihang nahitabo ang landslide. Natabunan ang ilang panimalay ug wala makagawas si Marissa. Martes, gikatahong nakit-an na ang patayng lawas niini. Pasidaan sa OCD Gina-monitor na karon sa Office of Civil Defense ang ubay-ubay nga mga landslide-prone area, ilabi na human nahitabo ang landslide sa Maco, ug tungod usab sa nagsingabot nga bagyong Chedeng. Wala kuno nagkulang sa pahimangno ang OCD sa rehiyon ngadto sa mga nagpuyo sa mga landslide-prone area. Kaniadto pa man, ila nang gipasidad-an ang mga residente sa maong mga dapit nga kung musulod na gani ang panahon sa ting-ulan, kinahanglang magbinantayon aron. Aron makasiguro, mas maayo nga mo-bakwit na lang dayon. Ang barangay Masara sa Maco, usa sa mga lugar sa rehiyon nga matud sa OCD, dugay na nilang gi-identify nga landslide-prone area. Alang sa mga nagpuyo duol sa mga bakilid nga dapit, ilabi na kadtong duna nay nahitabong landslide kaniadto, gitambagan sa OCD nga mamakawit na. Gawas sa landslide, gitutokan usab sa OCD ang mga lugar sa rehiyon diin ginabaha kung mubundak ang ulan. - Testigo