Opisyal sa unyon sa YBLC sa Davao kalit nawagtang

Gikahadlukang gidagit niadtong Sabado sa wala pa mailhing mga tawo ang usa ka miyembro sa board of directors sa unyon sa mga trabahante sa Yellow Bus Line Company (YBLC). Nibalik ang operasyon sa YBLC niadtong Sabado human temporaryo kining naundang sa sulod sa usa ka semana tungod sa pagpamomba sa mga bus niini gawas sa dakbayan. Apan sa ilang pagbalik, nabalitaan gikan sa pipila ka mga empleyado sa YBLC sa dakbayan ang pagkawala ni Jimmy Riosios, usa mga director sa union sa mga trabahante. Si Riosios usa usab sa mga mekaniko sa maong bus lines. Nawala niadtong Sabado si Riosios og hangtod karon wala pay balita bahin kaniya. Misteryo pa gihapon ang pagkawala niini ug dili matino kung gidagit kini o kinsa man ang reponsable sa iyang pagkawala. Milaom ang mga trabahante sa YBLC nga mapanalipdan ang ilang seguridad labi na paggawas nila sa dakbayan, karon nga gibalik na ang operasyon sa bus company. Madumdumang human sa sunud-sunod nga pagpamomba sa Weena Bus, ang YBLC na usab ang gipunting sa pagpamomba sa Tacurong City. Gibutyag ni Tacurong City police chief Senior Supt. Joel Limson, ang Alcobar Group mao gyud ang gitudlong utok sa pagpamomba. Gikaingong ang Alcobar Group usa ka organisadong pundok sa mga bandido nga gipasanginlang utok sa sunud-sunod nga pagpamomba sa pipila ka mga bus sa Weena Bus Company dili pa dugay. Gituuhang improvised explosive device nga cellphone operated ang gigamit sa mga suspek sa pagpamomba sa usa ka bus sa YBLC, diin duha ang nanga-angol. - Testigo