NPA raid sa Davao: 6 ka pulis gi-relieve

Unom ka mga sakop sa San Isidro Police Station sa Davao Oriental gi-relieve base sa order sa regional command sa Philippine National Police (PNP). Na-relieve si police inspector Efren Viajedor isip hepe sa San Isidro police station human na-ransack sa mga sakop sa New People’s Army niadtong Miyerkules ang police station. Apil nga na-relieve ang unom ka mga pulis nga ana-a atol sa raid. Gibutyag ni Chief Inspector Querubin Manalang, tigpamaba sa regional command sa PNP, nga ang pito gipa-report na karon sa provincial police office. Aminado ang mga pulis nga nalutsan sila sa mga rebelde sa maong raid. Dili lamang “relief" ang masinatian sa mga pulis nga nalutsan sa mga rebelde kon dili ipa-ilalom na usab sila sa imbestigasyon aron masuta kung nagpasagad sila o wala sa ilang trabaho. Kon mapamatud-an nga nagpasagad, kasong administratibo ang isang-at batok kanila. Raid Nahitabo ang raid mga ala-una hangtod ala una y medya sa hapon dihang niabot ang usa ka puti nga van. Nigawas sa van una ang tulo ka NPA nga nagpakaaron-ingnon nga dinakpan. Dinhi gisaysay sa mga pulis ang sunud-sunod nga pagsulod sa mga NPA og pagti-on usa-usa kanila og pistola. Si Viagedor, gitiunan usab sa mga NPA samtang naglingkod sa usa ka duyan. Human matiuni ang mga pulis, gilimas sa mga NPA ang mga armas sa station. Nakuha sa mga rebelde ang mga m16 rifle, kalibre .45 nga pistola sa mga pulis, 9mm pistol ni Viagedor, kalibre .38 ug duha ka shotgun gikan sa guwardiya sa Sodaco nga gidis-armahan usab dungan sa raid sa San Isidro Police Staiton. Wala pa moluwat og pahayag si Viagedor bahin sa hitabo. Ang duha ka van nga gigamit sa mga NPA, ingon man ang Elf truck nga gihimong getaway vehicle, na-recover ug nakatambay sa San Isidro Police. - Testigo