Sa ginanap na media round table sa Las Vegas para sa kaniyang concert sa Asya na kasama ang Pilipinas ngayong 2018, hiningan ng komento ang French-Canadian superstar na si Celine Dion tungkol sa pagpapalit ng gender identity ni Jake Zyrus, na noo'y si Charice Pempengco, na nakasama niya noon sa isang concert.

Sabi ng international singer, hindi raw niya malilimutan ang naging duet nila ni Jake sa kaniyang concert na ginanap sa Madison Square Garden noong 2008.

Ayon kay Celine, nirerespeto niya ang desisyon ni Jake.

Pinalitan pa nga ni Celine ng "he" ang paggamit niya ng "she" kay Jake nang maalalang nagpalit na ito ng kasarian.

"My jaw is still dislocated because the whole arena was, and I remember, she dedicated her song to her mother. So I think, if I may now switch, I'm pretty sure that 'he' remembers dedicating the song to his mother and a big talent," saad ni Celine sa naturang press conference para sa kaniyang "Celine Dion Asia Tour 2018."

Suportado raw si Celine sa desisyon ni Jake.

"I just wished him the very, very best. I hope that acceptance is hard but we have to.. we cannot start by judging because is there a final answer really? If you feel a certain way, you feel that way. We can talk about it, but this is how you feel, and this is how I feel, but this is how Charice felt, and we have to respect that," pagpapatuloy niya.

Masaya raw si Celine na nabigyan niya ng pagkakataon si Jake na magbigay ng madamdaming awitin para sa ina nito.

"And I wish him the very best, and I am very proud that I have given him the moment that when he sang with his heart and people were crying and his mother was extremely proud," pag-alala pa niya.

Inanunsyo na gaganapin ang concert ni Celine sa unang pagkakataon sa Pilipinas sa Hulyo 19, 2018, sa Mall of Asia Arena. -- FRJ, GMA News