Ginawaran ng German Moreno Youth Achievement Award si Kapuso star Ivan Dorschner sa katatapos lang na 65th Filipino Academy of Movie Arts and Sciences (FAMAS) Annual Awards nitong Huwebes.

 

 

"Sa ngayon po nagpapasalamat ako sa board of FAMAS, sa mga curators of our own local contributions to our pop culture... Sana nafi-feel niyo na I love what I do and I love other people that also love what I do and I would just like to say thank you for [the recognition]," sabi ni Ivan sa kaniyang speech.

 

 

Ayon pa kay Ivan, hindi raw niya  namamalayan na nakakapagbigay pala siya ng inspirasyon sa mga kabataan, at gusto rin niyang ipakita ang award sa kaniyang mga magulang.

"It feels very important. I'm very thankful sa council ng FAMAS at hindi ko alam kung ano 'yung ginawa ko mismo. Kung achievements, sana itemized list siya para mapakita ko naman sa mga magulang ko," kaniyang sabi.

"I think ang pinakaimportante rito ay 'yung mga natutuwa sa mga ginawa namin. Naapektuhan namin sila. Sana binigyan namin sila ng karapatan sumaya, ngumiti every night sa bawat event namin," dagdag pa niya.

At dahil nakapangalan kay the late German "Kuya Germs" Moreno ang kaniyang award, inalala rin ni Ivan ang kaniyang karanasan kay The Master Showman.

"Naaalala ko nu'ng mga first days ko sa GMA, hinila ako bigla ng mga executives papasok sa office ni Kuya Germs. The whole office was a trophy in and of itself. Kitang-kita lahat ng mga pagiging creative and artistic niya sa mismong office space niya. So if I'm a person this year na nakatanggap ng award na nakapangalan sa kaniya, you can call me proud."

Nagpasalamat din si Ivan sa Kapuso network sa pagbibigay sa kaniya ng oportunidad na ipakita ang mga talento niya.

"GMA has really shown me many doors opened. Choice ko naman buksan 'yon so thank you to GMA."

Bukod pa kay Ivan, natanggap din ni Dubsmash Queen Maine Mendoza ang naturang award.

Sa naturang gabi ng parangal din, nanalo naman bilang Best Supporting Actor si "My Korean Jagiya" cast member Ricky Davao para sa pelikulang "Iadya Mo Kami."

 

 

—KG, GMA News