EA Guzman, nakahiligan ang pagluluto ngayong quarantine

Malugod na ikinuwento ni Kapuso actor Edgar Allan Guzman ang kanyang mga achievement ngayong quarantine at kabilang na diyan ang pagluluto.

Saad ni EA sa GMANetwork.com, magmula noong idineklara ni President Rodrigo Duterte ang pagpapasara ng NCR at ilang parte ng bansa, nakahiligan na niyang gumawa ng iba't ibang gawaing bahay.

Aniya, “Since nag-start 'yung ECQ, mas naging focused ako sa gawaing bahay.

“May time na ako para makatulong sa mommy ko, na maglaba at maglinis ng sarili kong kuwarto.

“Kahit may katulong kami, kumbaga parang tinuturuan ko na rin 'yung sarili ko in time for my future.

“And mas marami akong natutunan na iluto from my mom. Every dinner, tuwing kakain kami, nagpapaturo ako sa kanya. Tinintingnan ko 'yung pinapakain niya, ano-ano 'yung ingredients, at kung paano iluto iyon.”

Kaya naman hindi kataka-taka na magbukas si EA noong August 4 ng sarili niyang business na hango sa mga luto ng kanyang ina.

Malaki ang pasasalamat ng aktor dahil kahit kasisimula pa lamang nito ay successful ang naging dry run niya noong Lunes.

Kuwento pa niya, fully booked na raw ang kanilang reservations sa mga susunod na linggo.

Pero para kay EA, ang mas importante sa kanya ngayon ay ang mabuting kalagayan ng kanyang pamilya.

Wika niya, “Happy ako kasi lahat kami, 'yung family ko, healthy.

“Kahit maraming nangyayari sa buong Pilipinas o sa ibang tao, blessed pa rin kami na healthy 'yung family namin.”