Proud na ibinahagi ng internet personality na si Rita Gaviola a.k.a. "Badjao Girl" na nakapagtapos na siya ng senior high school.
Sa social media, ipinakita niya ang kanyang larawan kung saan nakasuot siya ng toga kasama ang kanyang partner na si Jeric at kanilang anak na si Kia.
"Kayo yung dahilan kung bakit ginagalingan ko sa lahat ng bagay," sulat ni Rita sa caption.
Marami naman ang nagpaabot ng pagbati sa newly grad para sa bagong achievement nito.
"Aabangan ka namin sa college journey mo," komento ng Instagram user na may handle na @merksvins.
Hinangaan naman ni @mimijome si Rita dahil nakuha niya pa ring makapagtapos ng pag-aaral sa kabila ng pagiging ina at maybahay, at pagiging breadwinner ng kanyang pamilya. May pito siyang kapatid.
"Congratulations baby Rita patuloy lang sa page akyat pataas patungo sa pag tupad ng Yong pangarap salamat at di mo isinuko ang iyong [pangarap] dahil yan ang magdadala sayo sa pag angat..at yan ang kayamanan mo na di makukuha ng kahit na sino god bless you at sa'yong pamilya," sabi sa komento.
Nag-viral noon si Rita nang makuhanan siya ng litrato habang nanliimos sa Pahiyas Festival sa Lucban, Quezon noong May 2016. Labingtatlong gulang siya noon.
Karga pa niya ang kanyang nakababatang kapatid, na nagpaantig sa puso ng netizens.
Bagamat bakas sa hitsura niya ang kahirapan, litaw ang ganda si Rita na isang Badjao kaya naman binansagan siyang "Badjao Girl."
Balikan ang nakakaantig na kuwento ng pagbangon ni "Badjao Girl."
Nagsimulang makilala si Rita Gaviola nang mag-viral ang larawan niya sa social media na nakuhanan mula sa Pahiyas Festival sa Lucban, Quezon noong May 2016.
Dahil dito, binansagan siyang "Badjao Girl."
Kasa-kasama niyang nanlilimos ang kanyang nakababatang kapatid. Ginalugad nila ang bawat lansangan para makalikom ng pera para may pangkain. Ni pambili ng tsinelas ay wala si Rita kaya tiniis niyang mamalimos nang nakatapak sa mainit na kalsada.
Tumayong breadwinner si Rita ng kanyang pamilya. May pito siyang kapatid. Ang kanyang ina ay hindi nakapag-aral, samantalang ang kanyang ama ay isang mangingisda.
Namulat sa kahirapan si Rita at bata pa lang ay natuto nang mamalimos sa daan. Hindi alintana ni Rita ang panganib ng pamamalimos sa kalsada para may maiuwing pagkain para sa kanyang mga kapatid. Pagbabalik-tanaw niya, "Nakikita ko ganito pala 'yung hirap. Hindi ako takot (mamalimos) kasi may mga kapatid pa po ako na mga umaasa sa 'kin kasi nakikita ko po 'yung hirap ng mga magulang ko. So inisip ko po, ayaw ko po dumagdag. Parang iniisip ko, dagdag gastusin ako, pakainin ako sa bahay. Para sa 'kin, kahit napakabata ko pa po, nagtatrabaho na 'ko, nag-start na 'ko mamalimos."
Lahat na ng paghihirap ay tila naranasan na ni Rita. Naranasan na rin niyang hulihin ng pulis dahil pinaghihinalaan silang sindikato at nakatanggap ng masasakit na salita. Ani Rita, "Sinabihan ako na 'ang lakas-lakas mo. Dinadala mo pa 'yung bata. Ano ba kayo, mga sindikato?' 'Yung gano'ng words po. Parang sa 'min, sana hindi n'yo po maranasan 'yung buhay namin."
Pangarap ni Rita na makapagtapos ng pag-aaral. Nabanggit niya sa kanyang YouTube vlog na nangarap siyang maging flight attendant at makapagtapos sa kursong criminology.
Ang viral niyang larawan ang nagbukas sa kanya ng mga maraming oportunidad. Dahil sa kanyang exotic beauty at balingkinitan na katawan, papasa siyang maging modelo.
Marami ang nagbago sa buhay nila Rita nang kumalat ang kanyang larawan online. Aniya, "Sobrang nagbago po kasi, unang-una, 'yung papa ko nabigyan po ng trabaho. Pangalawa, hindi po kami namomroblema sa araw-araw. Pambaon po dati ako po 'yung binibigyan, ngayon ako na nagbibigay sa mga kapatid ko. Saka hindi na po nila nararanasan matulog sa kalye. Ang sarap ng buhay nila ngayon kasi kahit papa'no no'ng pandemic, nakaka-survive kami, nakakapagbigay pa rin ako sa kanila. Nasa province po sila lahat, nasa Lucena."
Dahil marami ang humahanga sa kanyang natural na kagandahan, minsan nang pinangarap ni Rita ang pagsali sa Miss Universe Philippines.
Nagkaroon din ng endorsements si Rita na karamihan ay skincare brands.
Nakuha na rin niyang regaluhan ang kanyang ama ng pinapangarap nitong motorbike na nagkakahalagang Php 100,000. "Kahit wala na 'ko nabibili para sa sarili ko, 'yung naiipon ko hindi gaano kalaki pero nakakatulong po ako."
Isa na ngayong proud nanay si Rita, 19. Makikita sa kanyang social media accounts ang kanyang pagiging hands-on mom sa anak niyang si Kia. Aniya, gagawin niya ang lahat para hindi nito maranasan ang paghihirap na dinanas niya noon.
Matapos mabiyayaan ng endorsements at iba pang proyekto, patuloy ang pamamayagpag ng career ni Rita. Sa katunayan, isa na rin siyang negosyante ngayon. Siya at ang kanyang partner ay nagmamay-ari na ng isang food business. Bahagi ni Rita, "Noong simula kong pasukin 'yung pagiging celebrity, grinab ko na 'yung opportunity na sana magtuloy-tuloy na para 'yung mga kapatid ko, 'di na nila kailangan mangutang, 'di na kailangan pumunta sa kalye para mamalimos ulit. Unti-unti kaming nakaka-survive."