Neri Naig gets featured in Harvard Business School's Instagram account

“Ay! Si Harvard na mismo ang nagpost n'yan ha!” bitiw ni Neri Naig, ang misis ni Chito Miranda, nang i-repost niya ang Instagram feature niya sa Harvard Business School Online.

Maaalala na noong Agosto, ibinahagi ni Neri na balak niyang mag-enroll sa online program ng prestihiyosong unibersidad.

Kaya naman abot-tenga ang ngiti niya nang ibahagi ng Harvard University ang litrato niya na nag-aaral sa labas ng kanilang bahay.

Dagdag ni Neri sa post, “Ina-acknowledge nila na estudyante nila ako.

“Mommmmy! Taong tao na ako. May tatak Harvard na oh!”

Kasalukuyang kinukuha ni Neri Naig ang Entrepreneurial Essentials Course sa nasabing unibersidad.

Ibinahagi niya noong Setyembre na natanggap siya sa nasabing kurso matapos i-post ang kanyang course verification form.

“I am happy! Sobra! Nakakaproud dahil kapag may ginusto ako, gumagawa talaga ako ng paraan,” aniya.

“Walang excuses dapat. Paano ko malalaman kung para sa akin kung hindi ko susubukan, 'di ba?

“Everyday, dapat naghahanap tayo ng mga paraan para ma matuto pa. Mag-invest ka sa sarili mo.

“Tandaan, hindi pahuli ang lahat. Kahit ano'ng edad mo pa.”

Ayon sa website ng Harvard, ang kursong Entrepreneurial Essentials ay makakatulong sa mga gustong gawing isang “viable business venture” ang kanilang mga ideya.