Glaiza De Castro, binalikan ang pagganap kay Gregoria De Jesus sa historical docudrama na 'Katipunan'

Binalikan ni Glaiza De Castro ang pagganap niya bilang Gregoria De Jesus sa 2013 GMA News and Public Affairs historical docudrama na Katipunan sa araw ng kapanganakan ng "Ama ng Katipunan" na si Andres Bonifacio kahapon, November 30.

Ibinahagi ni Glaiza ang eksena nila ni Sid Lucero, na gumanap sa papel ni Bonifacio, mula sa docudrama para magbigay-pugay sa pambansang bayani ng bansa. Si Gregoria, o kilala sa pangalang Oriang, ay ikalawang asawa ni Bonifacio. Bilang maybahay ng lider ng rebolusyon, malaki ang naging kontribusyon ni Oriang sa Katipunan kaya naman binansagan siyang "Ina ng Rebolusyong Pilipino."

Ika ng aktres, "Isang pagbabalik tanaw sa espesyal na proyekto upang magbigay pugay kay Andres Bonifacio.

"Bukod sa pagiging Ama ng Katipunan, siya ay nagsumikap maging mabuting haligi ng tahanan; at sa parehong aspeto, dapat natin ipagpatuloy magsumikap alagaan ang mga ipinaglaban niya at ng iba pang bayani ng Pilipinas."

Nag-iwan pa ng isang matapang mensahe si Glaiza sa kanyang fans at followers noong Bonifacio Day.

Dugtong niya, "Tulad nga ng Ama ng Katipunan, matuto tayong manindigan sa nararapat at ipaglaban ang sariling atin. Hindi padadaig hanggang dulo. Panatilihin nating isabuhay ang mga magandang sinimulan."

Sa mga nais balikan ang Katipunan, mapapanood ang full eight episodes nito sa GMANetwork.com o GMA Network app.

Samantala, narito ang iba pang artistang gumanap bilang babaeng bayani sa telebisyon at pelikula: