'Gusto ko pong patunayan sa mga tao na aayusin ko 'yung buhay ko for my baby' - Mark Herras

Ilang buwan nang bulung-bulungan sa showbiz ang isang isyu tungkol kay Kapuso actor Mark Herras. Kaya naman ngayong Linggo sa Startalk ay nagpaunlak siya ng isang exclusive interview para isapubliko na ang isyung kanyang itinago.

 

Sa umpisa pa lamang ng interview ay itinanong na agad ng Startalk hosts na sina Ricky Lo at Butch Francisco kay Mark kung ano ang aaminin niya sa publiko. Agad namang sumagot si Mark at buong tapang niyang isiniwalat ang balitang mayroon na siyang anak.

 

“First time kong sasabihin sa masa, sa buong tao, sa media, sa TV. Mayroon na po akong anak. She's a girl, three months old. Siya po ‘yung baby ko sa buong buhay ko. ‘Yun po ‘yung gusto kong sabihin sa lahat ng tao. ‘Yun po ‘yung gusto kong aminin,” pahayag ni Mark.

 

Ayon kay Mark, Ada raw ang ipinangalan niya sa anak. Ang ibig sabihin daw nito ay first baby girl. Hindi celebrity ang ina ni Ada at kinumpirma ni Mark na ito ay mas matanda sa kanya ng limang taon. Si Mark ay 27 years old.

 

Sa ngayon ay hindi magkasama si Mark at ang ina ni Ada. Kaya naman itinanong ni Ricky kung may balak ba silang magsama dahil may anak na sila. “Actually po sa ngayon, ang napag-usapan po namin [ay] kailangan naming magtulungan para sa baby, para masuportahan ‘yung bata para mapalaki nang maayos. Lahat ng pinag-uusapan namin is tungkol sa baby. Tsaka na ‘yung sa amin, kung ano ‘yung mangyayari sa amin someday or kung anuman,” anang aktor.

 

Sunod na nilinaw ni Butch kay Mark kung totoo bang magkarelasyon pa sila ng ex-girlfriend niyang si Ynna Asistio noong nangyari ang pagbubuntis ng ina ni Ada. Inamin naman ito ni Mark at sinabi niyang humingi na siya ng tawad sa dating nobya at sa pamilya nito. Pero nilinaw ni Mark na hindi raw ito ang dahilan ng kanilang paghihiwalay ni Ynna.

 

“Alam ko ang nagawa kong mali. Alam kong malaking kasalanan ‘yung nagawa ko. Pero nariyan na ‘yung baby eh. Hindi ko naman puwedeng sabihin na kalimutan ko ‘yung baby at piliin ko sila di ba. Dugo ko po ‘yung bata. Anak ko po ‘yun. Ako po ‘yung daddy,’ dagdag niya.

 

Paliwanag ni Mark, natagalan daw ang pag-amin niyang mayroon na siyang anak dahil inisip niya ang posibleng mangyari sa kanyang career. Ang nagtulak daw sa kanya ay mismong anak niya dahil mahal na mahal niya raw ito at isa siyang proud father.

 

"Siyempre artista po ako. Unang-una 'pag nalaman ng tao na pag mayroon kang anak di ba syempre maaapektuhan 'yung trabaho mo, 'yung buhay mo, 'yung career mo. Pero by this time kasi, kaya ako

naging matapang kasi sawang-sawa na akong magdeny eh. I'm very proud of Ada dahil siya po ang aking first baby girl. Kaya po ako umaamin ngayon sa harap ng maraming tao, sa studio, sa TV, sa media para po matigil na 'yung kakatanong nila sa akin tungkol sa baby," aniya.

 

“Nag-promise po ako sa mommy niya na kahit ano pong mangyari [ay] narito lang ako for Ada. Susuportahan ko siya sa lahat--money, love, ‘pag may sakit ang bata. Lahat ng kailangan ng batang iyon [ay] gagawin ko. Kaya ‘yung buhay ko ngayon, mas kilala niyo ako na medyo bad boy, playboy, sobrang mag-iiba po iyon ngayon,” saad ni Mark.

 

Dagdag pa niya, “Gusto ko pong patunayan sa mga tao at sa lahat ng gusto pang maniwala sa akin na magpapakabait po ako at aayusin ko ‘yung buhay ko for my baby dahil iba na po ‘yung usapan ngayon eh. Hindi na po ito basta laro-laro sa trabaho. Hindi na ito basta career. It's all about a baby, a kid na sobrang mahal ko.”

 

Hiningi rin ni Mark ang pang-uunawa ng mga taong nakapaligid sa kanya lalo na ang kanyang fans na walang sawang sumusuporta sa kanya. “Sana po [ay] nariyan pa rin po kayo para suportahan ako. Sana ‘wag kayong magalit sa akin. Narito po ako ngayon sa harap ninyo at nagsasalita, umaamin. Sinasabi ko po lahat ng totoo na I'll be a good father to my baby, to my Ada, to be a responsible father to my baby,” pakiusap ni Mark sa kanyang fans.

 

Bago matapos ang interview ay inamin ni Mark na naging pasaway talaga siya kaya’t naging magulo ang takbo ng buhay niya. Dagdag niya, “Marami akong naging kasalanan pero ito lang ang masasabi ko, hindi ko kasalanan si Ada.”

 

Ano ba ang message ni Mark para sa anak?

"Ada Im so sorry kung natagalan kitang aminin sa lahat ng tao. Pero I promise you and to your mom na I'll be there always to support you sa lahat ng bagay hanggang sa paglaki mo, hanggang sa mag-aral ka na. Nako Ada mahihirapan kang magkaroon ng boyfriend dahil ako ang tatay mo. Mahihirapan ka, seryoso ako roon," pahayag niya.

 

Patuloy na subaybayan si Mark Herras sa Rhodora X, weeknights after Carmela on GMA Telebabad. -- Text by Al Kendrick Noguera, GMANetwork.com