Cristy Fermin, indicted sa cyber libel case laban kay Sharon Cuneta, Kiko Pangilinan
Photo Inside Page
Photos
Indicted ang entertainment reporter na si Cristy Fermin sa isinampa sa kaniyang cyber libel ng mag-asawang dating senador na si Kiko Pangilinan at Megastar Sharon Cuneta. Humaharap ngayon ang entertainment reporter sa limang kaso ng cyber libel.
Inaprubahan ng Makati Prosecutor's Office ang pagsumite ng kaso laban kay Cristy sa regional trial court.
“It is respectfully recommended that Cristinelli S. Fermin be indicted for five counts of libel under Article 355 of the RPC (Revised Penal Code) in relation to Section 4 (c)(4) of RA 10175, and the corresponding Information be filed in court,” saad sa resolusyon.
Ang Section 4 (c)(4) ng RA 10175 ay tumutukoy sa “unlawful or prohibited acts of libel as defined under Article 355 of the Revised Penal Code, as amended, committed through a computer system or any other similar means which may be devised in the future.”
Kinasuhan si Cristy ng cyber libel para sa mga videos na in-upload niya sa kanyang YouTube channel na 'Showbiz Now Na' na ayon kina Sharon at Kiko ay “baseless” at “malicious."
Nagrekomenda rin ang prosecutor ng bail na nagkakahalaga ng Php48,000 kada kaso ng libel, na aabot sa Php240,000.
Inanunsyo rin ni Cristy ang naging resulta ng kaso sa kaniyang YouTube channel at sinabing hindi pa tapos ang laban. Nagbigay rin siya ng pasasalamat sa lahat ng sumusuporta sa kaniya, ngunit pinayuhan na 'wag silang mag-alala.
Aniya, “Ang amin lamang po dito ay hindi lang naman ngayon ang laban. Ito po ay sa piskalya pa lamang. Sa mga nag-aalala po, nalulungkot, at ika nga ay nakikisimpatya sa inyong lingkod, 'wag po. Unang hakbang pa lamang po ito sa piskalya. Aakyat po ito ngayon sa RTC Makati.”
“Kung ano man po ang maganap na resulta sa pagdinig dito, meron pa po tayong court of appeals at pagkatapos po ng court of appeals, 'pag hindi rin natin nakuha ang tagumpay, meron pa pong kataastaasang hukuman, ang supreme court,” pagpapatuloy ng entertainment reporter.
Sabi ni Cristy, ang mahalaga ngayon ay malaman ng lahat na hindi niya uurungan ang laban at patuloy na maniniwala na “lahat ng tao meron pong dahilan at katwiran sa kanilang pinaglalaban.”
Samantala, silipin ang ibang high profile libel sa Philippine showbiz sa gallery na ito:
