Around GMA

Article Inside Page

Hindi naging madali para sa batikang TV host na si Boy Abunda ang pasukin ang pagiging content creator nang gumawa siya ng sariling YouTube channel para sa kanyang interviews matapos siyang mawala sa telebisyon taong 2020.

Sa one-on-one interview ni Nelson Canlas sa nagbabalik-Kapuso na si Boy para sa GMA Integrated News podcast na Updated with Nelson Canlas, inamin ni Boy na talagang nahirapan siya na intindihin ang sistema ng social media.

Aniya, “It was daunting, it was tough, it was difficult. Hindi ako digital native, hindi ako masiyadong pamilyar sa maraming bagay. Tama lamang 'yong aking kaalaman pagdating sa social media halimbawa.”

“Pero noong pandemya marami tayong natutunan na hindi natin inaakalang matututunan natin. Katulad na lang halimbawa ng pagyu-YouTube, pagti-TikTok, pag-FB. Lahat ng 'yan natutunan natin, natutunan ko dahil kailangan,” dagdag pa niya.

Ayon pa kay Boy, bagamat kinailangan niyang aralin ang social media ay hindi niya naman hinayaan ang kanyang sarili na magpalamon dito.

“Pero on the personal side ayokong lamunin ng social media. Naroon ako dahil may gusto akong gawin, I wanted to be able to continue doing my interviews, I wanted to be able to do my commentaries, I wanted to be able to present kahit takot na takot ang mundo dahil there was a point when hindi natin alam kung anong magaganap, early to late 20s,” ani Boy.

Paglilinaw niya, naging daan naman ang kanyang YouTube channel upang maipakita sa mga tao ang kanyang presensya kahit pa nawalan siya ng programa sa telebisyon.

“I think were some of the most uncertain times kaya 'yon navigating the various platform was difficult, pero pamilyar naman tayo doon sa hindi tayo sanay. So pinasok ko 'yon dahil kailangan, pinasok ko 'yun dahil that was the only way to be present, that was the only way to get by, to even survive. And to be able to do what I love most which was what? Talking to people, interviewing and doing shows,” pagbabahagi ni Boy.

Sa ngayon, mayroon nang 1.79 million subscribers ang YouTube channel ni Boy na The Boy Abunda Talk Channel.

Matapos naman ang dalawang taon, muli nang mapapanood si Boy sa telebisyon bilang nagbabalik-Kapuso nang pirmahan niya ang kanyang kontrata sa GMA Network nitong December 15, 2022.

KILALANIN ANG TINAGURIANG PHILIPPINE KING OF TALK NA SI BOY ABUNDA SA GALLERY NA ITO.