Around GMA

Article Inside Page

Nakakuha ang iWitness documentarist at journalist na si Kara David ng tatlong awards sa naganap kamakailan lang na FAMAS Broadcast Arts Awards. Kabilang sa mga awards na natanggap niya ay ang shared spot nila ng aktres na si Ivana Alawi para sa Best Host for Public Service.

Sa Fast Talk with Boy Abunda, sinabi ni Kara na nirerespeto niya ang iba't ibang platforms, kabilang na ang journalism at vlogging.

“Nirerespeto ko at natutuwa ako na maraming iba't ibang tao na gumagamit ng kapangyarihan ng storytelling para makatulong sa iba. So, I acknowledge na iba-iba tayo ng platform,” sabi ni Kara.

Pero may paalala ang batikang journalist, “Sana lang, 'pag nag-public service talaga tayo, it's really for the public, not for ourselves.”

Matapos ang parangal, nagkaroon ng usap-usapan online na sana raw ay hiwalay ang kategorya ng content creators at journalists para sa naturang award.

BALIKAN ANG CONTRACT RENEWAL NI KARA DAVID SA GMA NETWORK SA GALLERY NA ITO:

Bukod sa pagiging Best Host for Public Service, hinirang din ang podcast ni Kara na i-Listen bilang Best Public Affairs Talk Show. Samantala, ang documentary niyang “Embalsamador de Motor” para sa i-Witness ay kinilala bilang Best Documentary Award.

Sa Instagram, ibinahagi ni Kara na isa sa mga gustung-gusto niya sa paggawa ng i-Listen ay ang oportunidad na makakuwentuhan ang mga ordinaryong tao na may ekstraordinaryong buhay.

“At the same time, I also get to interview celebrities and discover the person behind the fame and the spotlight. Celebrity man o hindi, lahat tayo may kuwentong dapat pakinggan. Kuwento na kapupulutan natin ng aral,” sabi ni Kara.

Pinasalamatan din ni Kara ang FAMAS Awards for Broadcast Arts para sa pagkilalang natanggap niya. Sa hiwalay na post, ipinangako ng batikang journalist na lalo pa nilang paghuhusayan ang kanilang trabaho.