Around GMA

Article Inside Page

Kabilang sina Kapuso actor Kelvin Miranda at It's Showtime host Vice Ganda sa mga nagwagi sa kauna-unahang The Filipino Academy of Movie Arts and Sciences (FAMAS) Broadcast Awards na ginanap nitong Lunes, July 20, sa Manila Hotel.

Nasungkit ni Kelvin ang Best Performer (Series/Anthology) award para sa pagganap niya bilang Adamus sa Encantadia Chronicles: Sang'gre. Samantalang si Vice, nagwagi bilang Best Host for Entertainment para sa It's Showtime, na nagwagi rin bilang Best Variety Show.

Nagwagi rin ang ilang Kapuso shows sa naturang awards, kabilang na ang Born to Be Wild bilang Best Educational Show. Nakuha naman ng Family Feud ang Best Show for Game, Reality, and Competition award.

Tinanghal na Best Entertainment Talk Show ang Fast Talk with Boy Abunda, habang ang Biyahe ni Drew, pinarangalan bilang Best Lifestyle Show.

Hinirang bilang Best Documentary ang “Embalsamador de Motor” ni Kara David para sa I-Witness.

Hinirang din si Kara, kasama si Ivana Alawi, bilang Best Host for Public Service. Nakuha naman ng podcast ni Kara na “I-Listen” ang Best Public Affairs Talk Show award.

Sa kaniyang speech, binigyang-pansin ni FAMAS President Francia Camacho-Conrado ang kahalagahan ng paglunsad ng pinakabagong awards body ng organisasyon sa kabila ng mga pagsubok na kinakaharap ngayon ng entertainment industry. Aniya, ang naturang event ay isang testamento ng media excellence.

"Tonight, we stand on the threshold of history as we proudly inaugurate the very first FAMAS for Broadcast Arts," sabi ni Camacho-Conrado.

Binigyang-diin din niya na ang naturang inisyatibo ay nagsisilbing bold declaration para i-recognize, i-celebrate, at i-uplift ang kagalingan sa lahat ng broadcasting at new media platforms.