Around GMA

Article Inside Page

Kinoronahan ni Miss Universe Philippines national director Shamcey Supsup-Lee bilang Miss Supranational Philippines 2023 ang pambato ng Bohol na si Pauline Amelinckx, batay sa live video na ipinost ng Missosology.

Parte si Pauline ng top five ng katatapos lang na Miss Universe Philippines 2023. Ginanap ang coronation night nito sa SM Mall of Asia Arena kagabi, May 13.

Bukod sa titulo, humakot ng special awards si Pauline sa nasabing prestihiyoso pageant: Miss Avana, Miss Creamsilk Ultimate, Miss Enderun, Miss Hello Glow, Miss Jojo Bragais, Miss Kemans Body, Miss Origee Beauty Drink by Skin Magical, Miss Smilee Apparel, Miss Soen, at Miss Titan Universe.

Nagpasalamat naman si Pauline sa mga sumuporta sa kanyang MUP journey. Matatandaang 2020 nang unang beses siyang sumabak sa MUPH kung saan nagtapos siya bilang third runner-up. Matapos ang dalawang taon, muli siyang sumali sa national pageant at itinanghal na Miss Universe Philippines Charity 2022.

"From the bottom of my heart, thank you so much for your love and your support every year. The past few years have been so heartwarming and has been one of those driving factors that really kept me going," aniya sa kanyang speech sa after-party ng Miss Universe Philippine 2023 na ginanap sa Cove Manila sa Okada.

Si Pauline ang pambato ng bansa sa Miss Supranational 2023 na gaganapin sa Strzelecki Park Amphitheater sa Małopolska, Poland sa July 14.

Samantala, ang Sparkle artist na si Michelle Dee ng Makati ang kinoronahang Miss Universe Philippines 2023 at pambato ng bansa sa 72nd edition ng international pageant na gaganapin sa El Salvador. First-runner up si Christine Juliane Opiaza ng Zambales, at second runner-up naman si Mary Angelique Manto ng Pampanga.

Miss Charm Philippines 2024 naman ang titulong napalanunan ng pambato ng Baguio na si Krishnah Marie Gravidez.

KILALANIN PA ANG MISS UNIVERSE PHILIPPINES 2023 NA SI MICHELLE DEE SA GALLERY NA ITO: