Benjie Paras, naniniwalang kaya ni Kai Sotto makapasok sa NBA
May mensahe ang National Collegiate Athletic Association (NCAA) analyst at tinaguriang "Tower of Power" ng PBA na si Benjie Paras sa Filipino big man na si Kai Sotto.
Sa video na in-upload ng GMA Sports PH sa Instagram, binanggit ni Benjie na naniniwala siyang kaya ni Kai na sungkitin ang kaniyang pangarap na makapasok sa National Basketball Association (NBA) dahil sa ipinapakita nitong determinasyon.
"It's a long journey for him 'no. Tinyaga niya 'yan. Nakita mo naman kung gaano kahirap 'yung pinagdaanan din. Ang sa'kin is good luck and alam ko naman na, 'pag ganyan na, 'yung dedication sa laro, 'yung pursuit na talagang ma-reach niya yung NBA na pangarap niya, I guess hindi malayo."
"So goodluck and nandito kaming lahat para sumuporta," ani Benjie. Ang video a mula sa GMA Masterclass: The Sports Series na ginanap sa Lapu-Lapu City, Cebu.
Samantala, marami naman ang humanga sa ipinakitang performance ni Kai Sotto sa kaniyang NBA Summer League debut kamakailan.
Sa loob ng 13 minutes, nakakuha si Kai ng six points at naisagawa niya ang four rebounds at three blocks.
Pangarap ni Kai na maging kauna-unahang full-blooded Filipino na mapabilang sa National Basketball Association.