'Firefly,' umani ng papuri sa unang araw ng showing

Umani ng papuri ang Firefly, ang opisyal na entry ng GMA Network sa 49th Metro Manila Film Festival, sa mga nanood sa unang araw ng showing nito kahapon, December 25.

Sa produksyon ng GMA Pictures at GMA Public Affairs, marami ang pumuri sa ganda ng istorya ng Firefly na umiikot sa batang si Tonton (Euwenn Mikaell) at ang kanyang paglalakbay patungo sa isla ng mga alitaptap.

Komento ng isang user sa X, na dating Twitter, "Eto yung movie na WELL-RESEARCHED. Yung parang pwede tong ikwento ni Kara David sa I-Witness? Alam mong GMA Public Affairs ang producer. NAPAKA GALING nung cinematography, effects, at pagkakalatag nung kwento. QUALITY FILM ANG FIREFLY. QUALITY!"

Madami ang pumuri hindi lamang sa istorya ng Firefly kung hindi pa rin ang direksyon ni Zig Dulay at cinematography ni Neil Daza.

Komento ng isang user, "Di kailangang umiyak, sumigaw, kahit nakatayo lang, ramdam mo siya."

Dahil sa nakakaantig na eksena ng Firefly, hindi napigilan ng mga manonood nito na mapaluha sa kuwento ng mag-inang Tonton at Elay (Alessandra De Rossi).

Sa ikalawang araw ng showing ng Firefly ngayong December 26, nananatili pa rin ito bilang isa sa trending topics sa X Philippines. Ang hashtag ng pelikulang #FireflyMovie ay may mahigit 14,600 posts.

Bukod kina Alessandra at Euwenn, kasama rin sa Firefly sina Miguel Tanfelix, Ysabel Ortega, Cherry Pie Picache, Epy Quizon, at Yayo Aguila. Mayroon ding special participations sina Max Collins at Kapuso Primetime King Dingdong Dantes.

Mapapanood pa ang Firefly sa mga sinehan sa buong bansa bilang parte ng Metro Manila Film Festival.