Mga Kapuso, wagi sa 2nd Laurus Nobilis Media Excellence Awards

Pinarangalan ang ilang Kapuso personalities sa 2nd Laurus Nobilis Media Excellence Awards.

Paraan ito ng pagkilala ng Lyceum of the Philippines University-Cavite na kilalanin ang mga mahalagang papel ng media sa lipunan.

Ang tema nito ngayong taon ay "Unraveling the Threads of Ground-breaking and Boundary-pushing Displays of Excellence in Filipino Media."

Iginawad sa Kapuso Primetime Couple na sina Marian Rivera at Dingdong Dantes ang Media Excellence in Film Acting.

Nakuha naman nina Mariz Umali at Ivan Mayrina ang Media Excellence in TV News Reporting, habang Media Excellence in Radio News Reporting naman ang inihandog kina Susan Enriquez at Joel Reyes Zobel.

Iginawad rin ang Media Excellence in Public Affairs Program Hosting kina Maki Pulido at Drew Arellano.

Nabingwit naman ni Papa Dudut ang Media Excellence in Radio Disc Jockeying.

Si National Artist for Film and Broadcast Arts at GMA Content Development Consultant Ricky Lee ang nagkamit ng Laurus Nobilis Icon for Media Excellence.

Ito ang pinakamataas na parangal sa Laurus Nobilis Media Excellence Awards at kinikilala nito ang makabuluhang mga kontribusyon niya sa industriya ng media bilang isang screenwriter, journalist, nobelista and playwright.

Naganap ang 2nd Laurus Nobilis Media Excellence Awards nitong March 8 sa LPU Cavite University Auditorium.

Dumalo dito sina Joel Reyes Zobel, Mariz Umali, Maki Pulido, Papa Dudut, at Ricky Lee para personal na tanggapin ang kanilang parangal.

Nagpadala naman ng mensahe ng pasasalamat sa pamamagitan ng videos sina Susan Enriquez at Ivan Mayrina.

Congratulations, mga Kapuso!