Nagsimula nang magpa-excite tuwing hapon ang isa sa pinakamalaking Thai revenge drama series na 'Man of Vengeance' sa GMA, na pinagbibidahan nina Tor Thanapob Leeluttanakajorn (Roy/Mico), at Fern Nopjira Lerkkajornnamkul (Thea).
Makakasama rin nila sa seryeng ito sina Typhoon Kanokchat Munyadon (Gerry), Ann Siriam Pakdeedumrongrit (Sylvia), Wattanajinda Sirapan (Eva), at Raviyanun Takerd (Kyla).
Ang 'Man of Vengeance' ay iikot sa kuwento ni Roy, anak sa labas ng isang mayamang pamilya na inakalang patay na ng lahat matapos na masangkot sa isang aksidente.
Sa kanyang pagbabalik, makikilala siya bilang si Mico para sa isang malaking paghihiganti.
Subaybayan ang 'Man of Vegeance,' Lunes hanggang Biyernes, 5 p.m. sa GMA.
Ang aktor na si Tor Thanapob Leeluttanakajorn ang gumaganap sa karakter ni Roy, isang anak sa labas na napilitang makisama sa pamilya ng kanyang ama simula nang pumanaw ang ina. Kailanman ay hindi naging maganda ang trato ng stepmom (Sylvia) at stepbrother (Gerry) nito sa kanya.
Tuluyang nagbago ang buhay ni Roy nang masangkot sa isang aksidente at inakalang patay na ng lahat. Sa pagbabalik, mabubuhay siya sa alyas na Mico para sa hinahangad na paghihiganti mula sa mga taong umapi at umabuso sa kanya.
Si Fern Nopjira Lerkkajornnamkul ang gumaganap sa karakter ni Thea, ang tanging naging karamay noon ni Roy sa pang-aaping naranasan sa pamilya ng ama. Tulad ni Roy, hindi rin nakaranas ng pagmamahal si Thea mula sa ina at kapatid.
Nang makita ni Thea si Mico, naalala niya ang kababatang si Roy. Mas lalong lumakas ang hinala ni Thea na si Mico at Roy ay iisa dahil sa suot na singsing nito na alaala ng yumaong ina ni Roy.
Si Ann Siriam Pakdeedumrongrit ang gumaganap sa karakter ni Sylvia, ang mapang-abusong stepmother ni Roy. Dahil anak sa labas si Roy ng kanyang asawa, kailanman ay hindi naging maganda ang trato niya rito. Siya rin ang dahilan kung bakit piniling tumalon ni Roy sa ilog at inakalang patay na ng lahat.
Si Typhoon Kanokchat Munyadon ang gumaganap sa karakter ni Gerry, ang babaerong stepbrother ni Roy. Tulad ng kanyang ina, kailanman ay hindi naging maganda ang trato niya kay Roy.
Sa ngalan ng salapi, handang gawin ng mag-inang Sylvia at Gerry ang lahat kahit na ang pumatay.
Si Wattanajinda Sirapan ang gumaganap sa karakter ni Eva, ang nagsilbing pangalawang ina ni Roy matapos na pumanaw ang ina at pabayaan ng ama. Si Eva rin ang tumulong kay Roy para magkaroon ng maayos at magandang buhay.
Si Raviyanun Takerd ang gumaganap sa karakter ni Kyla, ang mapagpanggap na stepsister ni Thea. Mahilig siya sa atensyon at gustong perpekto ang tingin ng lahat sa kanya.