Ngayong June 13, nag-file ng deportation case ang Kapuso comedienne na si Pokwang laban sa ex-boyfriend niyang si Lee O'Brian.
Ayon sa post ni Nelson Canlas, kasama ni Pokwang ang kaniyang abogado na si Rafael Vincente Calinisan ng Calinisan Domino and Beron Law Offices sa Bureau of Immigration sa kaniyang pagpupursige ng deportation case sa dating karelasyon.
Samantala, nag-post rin si Pokwang tungkol sa kaniyang legal battle laban kay Lee.
Ani Pokwang sa kaniyang Instagram post, "para sa karapatan ko at ng anak ko, para sa mga kapwa ko babae at sa bayan ko."
Matatandaang inamin ni Pokwang na hiwalay na sila ni Lee noong July 2022.
Sinundan naman ito ng pag-amin ni Pokwang noong January 2023 na naka-move on na si Lee mula sa kanilang relasyon.
Ayon sa post ng GMA Integrated News, mapapanood ang ulat tungkol sa paghain ni Pokwang ng deportation case mamaya sa 24 Oras.
SAMANTALA, BALIKAN ANG RELATIONSHIP TIMELINE NINA POKWANG AT LEE:
Sina Pokwang at ang American ex-partner niyang si Lee O'Brian ay nagkakilala taong 2014.
Nagkatrabaho sina Pokwang at Lee sa pelikulang 'Edsa Woolworth.'
Ayon sa isang Instagram post ni Pokwang, sa 'Edsa Woolworth' sila nagkahulugan ng loob ni Lee. Saad ng Kapuso actress, "Dito nagsimula ang lahat sa pelikulang Edsa Woolworth my mama and dad na naging true to life ang pag-iibigan hahahaha"
Taong 2018, ipinanganak ni Pokwang ang kanilang anak ni Lee na si Malia Francine O'Brian.
Ang kanilang anak ay laging nakikita sa social media accounts nina Pokwang at Lee. Tinawag nila si Malia na "Tisay ng Masa."
Saksi ang mga followers nina Pokwang at Lee sa masaya nilang pagsasama at pagpapalaki sa kanilang cute na anak na si Malia.
July 2022 nang inamin ni Pokwang na hiwalay na sila ni Lee. Ito ay nang maging usap-usapan ang tunay na estado ng kanilang relasyon.
Kinumpirma ni Pokwang na nagtapos ang kanilang anim na taon na pagsasama. Sa interview ni Pokwang, inamin din niyang pitong buwan na silang magkahiwalay ni Lee.
Sa interview na ito ni Pokwang ay ipinagtanggol niya si Lee sa mga bashers.
Saad ng aktres at host, "Sana ang alam ng tao na ang hinuhusgahan ninyo na si Lee O'Brian ay mabuting tao naman po. Mabuting ama. Nasasaktan lang ako sa mga nababasa ko na kesyo palamunin ko daw. Masipag po 'yung tao."
Inilahad ni Pokwang na sakali mang magtanong si Malia sa estado ng kanilang relasyon ay sasagutin niya ito. Ani Pokwang, "Naka-ready naman ako sa kaniya kung ano man ang katanungan niya. Ganoon talaga ang buhay."
Pagkatapos aminin ni Pokwang ang kanilang paghihiwalay ni Lee ay nakita ng netizens na maayos pa sila sa pag-aalaga kay Malia.
Ngayong 2023 ay ginulat ni Pokwang ang mga followers niya sa mga bago niyang statements tungkol kay Lee. Saad ng aktres sa isang nag-comment sa kanyang post sa Instagram, "Nagising lang ako sa katotohanan na anim na taon ko na pala siya palamunin at limang taon walang child support! Wag ka na baka madamay ka sa demandahan namin."
Saksi ang mga netizens sa mga bagong saloobin ni Pokwang tungkol sa ex-partner. Saad ng aktres, may iba nang girlfriend ngayon si Lee.
"Nagtagumpay siya na wasakin ang puso ng anak namin na ngarap na mabuo kaming muli!"
Sa latest Instagram post ni Pokwang ay nagbigay siya ng reaksyon sa mga nagsasabing huwag na i-post ang mga pinagdaraanan sa kaniyang personal na buhay.
Isang madamdaming interview ang hinarap ni Pokwang sa 'Fast Talk with Boy Abunda.' Dito, ibinahagi ng actress-TV host ang tunay na dahilan ng kanilang paghihiwalay nila ni Lee at ang isyu tungkol sa negosyong binuo nila noon.
Itinanong ni Boy Abunda kung umaasa pa ba si Pokwang na magkabalikan sila ni Lee. Sagot ng aktres, "Hindi ako magsisinungaling, Tito Boy. Talagang mahal ko siya, kaya lang sa mga lately na paghaharap namin parang nakita ko na okay, wala na.
Ang mensahe ni Pokwang sa kanyang ex-partner na si Lee O'Brian, "Minahal kita, lumaban ako para sa anak natin. Lahat ng pambabato sa akin sinasalo ko para sa anak natin."
Sa Instagram post ni Pokwang, sinabi niyang patuloy siyang lalaban para sa mga anak na sina Mae at Malia: "Bangon nanay ka at marami ka pang labada….. labada para sa ikauunlad ng pamilya #laban"
June 13, 2023, nag-post si Pokwang ng litrato ng papeles na naka-address sa Department of Justice at Bureau of Immigration.
Hapon ng June 13, 2023, personal na naghain si Pokwang ng deportation case laban sa ex-boyfriend niyang si Lee O'Brian. Kasama rin ng komedyante sa paghain ng kaso ang kaniyang lawyer na si Rafael Vicente Calinisan.