James 'Moymoy' Macasero at asawang si Diane, ikakasal na sa simbahan
Published On: September 18, 2015, 07:46 PM
Updated On: February 27, 2020, 02:33 PM
By AEDRIANNE ACAR
Matutupad na ang pinapangarap na church wedding ng Kapuso comedian na si James ‘Moymoy’ Macasero at ng kanyang misis na si Diane Macasero sa January 2016.
Kasal sa huwes sina James at Diane pero nais ng dalawa na magpakasal pa rin sa simbahan.
Sa interview ni Cata Tibayan sa 24 Oras sa engagement ng mag-asawa, ikinuwento ni James na gusto raw ng kanyang misis na ikasal sa Tagaytay.
“Dati sabi niya nung hindi pa kami kinakasal ‘yung ano pa lang dream ko 'to eh, dream ko makasal sa Tagaytay.”
Sobra raw niyang mahal si Diane at naniniwala sila na forever na silang dalawa.
“Sobrang mahal kita ayun, hanggang sa dulo ng walang hanggan. Kasama kita forever.”
Kinilig naman si Diane at sobrang nagulat sa proposal ng kanyang hubby.
Isang magandang Swarovski trio-band crystal ang engagement ring na ibinigay ng Bubble Gang star sa kabiyak.
“Hindi ko inexpect ‘yung effort niya na i-gather lahat tapos wala akong idea at all.”
Nagpaabot din ng pagbati ang Kapuso actor at best friend ni Moymoy na si Aljur Abrenica. Aniya, “Inspiring ‘yung love story nila and my message is keep on pursuing their dreams.”