Gabby Concepcion, handang mag-guest sa talk show ng dating manager na si Lolit Solis
Published On: October 06, 2015, 10:10 AM
Updated On: March 02, 2020, 06:51 PM
By CHERRY SUN
Certified Kapuso na ang 80’s heartthrob na si Gabby Concepcion, at nakapila na ang mga proyekto para sa kanya sa GMA.
Una niyang makakatrabaho ang Kapuso actress na si Carla Abellana. Aniya, malapit niyang kaibigan ang ama nitong si PJ Abellana kaya naman excited siya para rito.
“Parang meron kaming familiarity kaya masaya, maganda kasi ang gaganda rin ng projects ni Carla. Nakagawa na rin kami ng project, at masaya siyang kasama. She’s very professional. Okay kami,” pahayag ni Gabby sa panayam ng 24 Oras.
Dahil nasa Kapuso network na, may posibilidad din siyang mag-guest sa comedy-talk show ng kanyang dating talent manager na si Lolit Solis, ang CelebriTV.
Pagbati niya kay Lolit, “Hello! Kita ho tayo sa show ninyo. It’s nice to be back and it’s nice to do projects here in GMA.”
Nagkalayo ang loob nina Gabby at Lolit matapos ang isang di pagkakaunawaan kaugnay ng naganap na 1994 Metro Manila Film Festival.