Bahagi na ng showbiz industry ang pagkakaroon ng mga love teams. Sa katunayan, nagiging panimula pa ito sa gumandang karera ng isang celebrity, lalo na kung baguhan.
Ganito ang nangyari sa love teams ng UniLove Squad na binubuo magkakaparehang sina Marco Gallo at Heaven Peralejo o MarVen; Jerome Ponce at Krissha Viaje o KrisshRome, at Gab Lagman at Hyacinth Callado o HyGab.
Nagsimula sila bilang magkababarkada sa book-to-screen series na The Rain in España. Ito ay hango sa unang libro ng University Series, na may parehong titulo, ni Gwy Saludes. Sa naturang online series, nabuo ang love team nina Marco at Heaven, na nakabuo na rin ng matibay na fan base.
Sa sequel naman nitong Safe Skies Archer, nakapareha ni Krissha Viaje si Jerome Ponce, na bagong dagdag sa kanilang “univerkada.”
Sa ngayon, naghahanda na rin sina Gab at Hyacinth, na bibida naman sa ikatlong libro ng University Series, ang Chasing in the Wild.
Bagamat magkakasama sa isang proyekto, siniguro ng love teams na MarVen, KrisshRome, at HyGab na maayos ang relasyon nila sa isa't isa at walang anumang kompetisyon.
Ani Krissha, “Kami, we support each other, we're happy for each other. Minsan kami pa yung nag-aasaran sa isa't isa, to boost each other up. Hindi naman kailangan ng competition kasi iba-iba naman ang dynamics namin as love teams.”
Para naman kay Gab, pamilya na ang turing nila sa isa't isa.
“We built the foundation as a family na rin, e. So, we wanted to stay as a family and support each other. Like what Heaven said in the second book, na sina Jerome at Krissha ang [bida], we fully support them kasi this is their time. I know when it's our time, they're gonna support us as well,” sabi ng aktor.
Sumang-ayon naman dito si Heaven. Sa katunayan, aniya, “Ang maganda rin sa amin kasi hindi lang siya work. Umaalis din kami. Like last time, we went to La Union. Magkakasama kami, wala lang si Gab sa aming lahat. Also like itong mga girls, minsan natutulog sila sa bahay. So, walang competition, we're helping each other, actually. It's a very healthy relationship.”
Nakausap ng entertainment press, kasama ang GMANetwork.com, ang tatlong love teams sa launch ng Uni Love Squad kamakailan.
Kilalanin pa ang MarVen, KrisshRome, at HyGab ng Uni Love Squad dito:
Ipinakilala kamakailan ang Uni Love Squad kung saan tampok ang mga tambalan nina (mula sa kaliwa) Jerome Ponce at Krissha Viaje (KrisshRome); Marco Gallo at Heaven Peralejo (MarVen); at Gab Lagman and Hyacinth Callado (HyGab).
Unang nakilala ang love team nina Marco Gallo at Heaven Peralejo, o mas kilala bilang MarVen, sa online series na The Rain in España. Ito ang unang installment sa University Series na base sa Wattpad creation ni Gwy Saludes.
Ayon kay Marco, sa halos isang taon nila sa pagiging on-screen partners, nakikilala na niya nang husto si Heaven. “Over the past year that we've been together as a love team, I saw mapagmahal siya. Like, sa mga taong mimahal niya, sa mga kaibigan niya.”
Hindi raw inaasahan nina Heaven at Marco na magkakaroon ng following ang kanilang love team.
“Hindi namin ine-expect na magkakaroon pa ng mga project. So, nakakatuwa lang din na nabigyan kami ng mga pagkakataon na maipakitang kaya pala mag-work, pwede pala. Ginusto naman, masaya naman,” sabi ni Heaven. Muli silang magtatambal sa pelikulang Men are from QC, Women are From Alabang.
Mainit din ang pagtanggap ng fans ng University sa tambalan nina Krissha Viaje at Jerome Ponce, na binansagang KrisshRome, kahit bago lamang ang huli sa “univerkada.”
Sa sandaling pagsasama nila, mas naging malapit na sa isa't isa sina Jerome at Krissha. Sabi pa ng aktor sa kanyang kapareha, “Ang discovery ko sa kanya, she's very curious about everything sa pinapasok niya. Willing siyang matuto, willing siyang mag-explore.”
Pagkatapos magpakilig sa University series na Safe Skies Archer, bibida naman sina Jerome at Krissha sa horror movie na Sem Break.
Sa susunod na University series, ang Chasing in the Wild, bibida naman ang bagong tambalan nina Gab Lagman at Hyacinth Callado o mas kilala bilang HyGab.
Dahil bagong tambalan, inamin ni Gab na nakararamdam siya ng pressure. Pero aniya, “Pressure is good. I fell like when I feel the pressure, something big is gonna happen.”
Para naman kay Hyacinth, gusto lang niyang i-enjoy ang love team partnership nila Gab. Sabi niya, “Naturally, we hope for things to go well. For the meantime, walang expectation. I don't really expect much. I'm just enjoying the moment and the process of working together. For sure, it will go well.”
Habang naghihintay magsimulang mag-taping para sa Chasing in the Wild, mapapanood muna ng fans sina Gab at Hyacinth sa horror movie na Sem Break. Kasama nila rito ang KrisshRome love team.