Jake Vargas, mananatiling loyal na Kapuso

Ipinakita ni Jake Vargas na ang kanyang loyalty ay para lamang sa GMA Network sa kanyang muling pagpirma ng exclusive contract.

Ayon kay Jake, ang maging loyal sa GMA ay turo sa kanya ng kanyang itinuturing na ama sa industriya na si German "Kuya Germs" Moreno. Si Jake ay nagsimula ng kanyang showbiz career seven years ago sa GMA sa tulong ni Kuya Germs. 

Kuwento ni Jake sa kanyang contract signing na ginanap ngayong August 24, "Marami na ring nangyari bukod sa tulong sa akin ni Tatay (Kuya Germs). Nag-start ako sa Walang Tulugan hanggang sa dumadami na ang shows ko so ang dami na rin talagang naitulong sa akin."

Pagpapatuloy ni Jake, "Siyempre Kapuso talaga ako. Ang sabi sa akin naman ni Tatay hanggang marami kang naipapakita sa kanilang maganda, huwag kang aalis, [sa] 7 ka talaga."

Dahil kilala si Kuya Germs na supportive sa career ni Jake ay mas na-miss niya ngayong araw ang presence ng kanyang Tatay. Saad niya, "Everytime na may ganito, andiyan lagi si Tatay para suportahan ako. Alam kong ginagabayan niya ako lagi."

Nagpahayag naman si Jake ng kanyang pasasalamat sa GMA sa pagtitiwala at pagaalaga ng kanyang career.

"Siyempre gusto ko rin pasalamatan ang GMA Network sa pagtitiwala, sa pagmamahal."