WATCH: Cast ng horror-thriller na 'Hanggang Sa Dulo Ng Buhay Ko,' aminadong matatakutin

Horror-thriller man ang upcoming GMA Afternoon Prime series na Hanggang Sa Dulo Ng Buhay Ko, aminado naman ang mga lead stars nito na matatakutin daw sila sa tunay na buhay.

Sa katunayan, matagal daw bago napagdesisyunan ni Kris Bernal na tanggapin ang kanyang role dito dahil sa tema ng serye.

"Hindi mo masabi eh. Baka 'yung bad spirit nandiyan sa 'yo. Mapalapit ka kasi ginagawa mo siya eh. Dito sa show na 'to, kailangan mas strong 'yung faith ko, mas naging madasalin ako," pahayag niya.

Naalala naman daw ni Megan Young dahil sa show na ito ang creepy experience niya sa luma nilang bahay.

"Doon sa dati naming bahay, feeling ko may nanonood sa akin habang natutulog ako. So ginagawa ko, laging nakabukas ang pinto, laging dapat nandoon 'yung cat namin--sa kuwarto natutulog," aniya.

Si Rayver Cruz naman, parating kinakausap ang kanyang yumaong mga magulang.

"Honestly, takot talaga ko sa mga ganyan. Minsan nga kinakausap ko 'yung [parents ko]. Sobrang love ko si Mama tsaka si Papa, pero kinakausap ko sila na sa panaginip na lang po [tayo magkita]," natatawa niyang pahayag.

Panoorin ang buong ulat ni Lhar Santiago para sa 24 Oras: