Sa ilang taong pagpapasaya ni Willie Revillame ay marami na siyang nakatrabaho at nakasama. Sino-sino ang mga naging co-hosts ni Kuya Wil? Kumustahin sila sa gallery na ito.
Si Mariel Rodriguez ang pinakamatagal na nakasama ni Willie bilang kanyang co-host. Mula 'Wowowee,' 'Wil Time Bigtime,' hanggang 'Wowowillie' ay nagkatrabaho sila. Masasabing ito ang nag-launch ng kaniyang career. Happily married na rin si Mariel sa kanyang asawa na si Robin Padilla.
Isa rin ang komedyanang si Pokwang sa mga matagal na naging co-host ni Willie sa ‘Wowowee.’ Patuloy pa rin ang kanyang pagpapasaya, ngunit higit dito ay may nagpapasaya na rin sa kanya sa katauhan ng kanyang American boyfriend na si Lee O’Brien.
Kasabay nina Mariel at Pokwang bilang co-host si Valerie Concepcion. Huling lumabas si Valerie sa 'Mulawin VS Ravena.' Hands-on mom din siya sa kanyang dalaginding na anak na si Fiona.
Naging dancer muna si RR Enriquez bago maging co-host ni Kuya Wil sa 'Wowowee.' Noong 2015, umingay ang kanyang pangalan matapos batikusin ng mga netizens ang kanyang naging viral na prank video kaugnay ang isang commuter. Agad siyang humingi ng dispensa at ayon sa kanyang Instagram profile, siya ay isang “sinner saved by Jesus.”
Isa si Iya Villania sa mga unang naging co-host ni Willie sa 'Wowowee.' Bilang isang Kapuso, si Iya ay host ngayon ng 'Chika Minute' segment ng '24 Oras.' Hands-on mom din siya sa panganay nila ni Drew Arellano na si Baby Antonio Primo.
Naging ‘Wowowee’ co-host din ni Kuya Wil si Kat Alano. Ang English-Filipino model-host ay mas naka-focus ngayon sa kanyang music at arts.
Nanatiling Kapamilya si Jed Montero matapos ang kanyang hosting stint sa 'Wowowee.' Graduate ng UP Diliman si Jed at naging bahagi ng UP Women's Volleyball Team. Maliban sa showbiz ay busy siya sa pagiging isang entrepreneur. Isa rin siya sa mga Guest Services Officer na nag-asikaso sa mga kandidata ng 65th Miss Universe sa isang casino resort at hotel complex.
Si Lara Quigaman ang unang beauty queen na naging co-host ni Willie Revillame. Fulfilled ngayon ang Miss International 2005 titlist bilang misis ni Marco Alcaraz at ina ni Noah.
Taong 2010 nang mapabilang sa ‘Wowowee’ family ang Malaysian-Chinese na si Carmen Soo. Hanggang ngayon ay patuloy ang kanyang pagmomodelo, pag-arte, at pagkanta.
Kilala pa si Max Collins sa pangalang Isabelle Abiera nang mag-host sa 'Wowowee.' Mapapanood siya sa 'Bubble Gang,' at naging bahagi rin siya ng Kapuso shows na 'Encantadia' at 'The One That Got Away.'
Naging ‘Wowowee’ co-host din ni Willie si Roxanne Guinoo noong 2007. Pagkatapos ng apat na taon ay nagsimula na sila ng kanilang sariling pamilya ni Elton Yap. Active pa rin ngayon si Roxanne sa mundo ng showbiz.
Kabilang si Kelly Misa sa mga co-hosts ni Kuya Wil noong 2010. Ginagamit ni Kelly ang hilig at kaalaman sa fashion at beauty sa pagiging isang model, host, at blogger. Masaya rin siya sa kanyang mag-ama na sina Carlos Fernandez at Tristan Antonio.
Sa ‘Wowowee’ nagsimula ang showbiz career ng ngayo’y Kapuso comedienne na si Janna Dominguez. Siya ay mapapanood sa ‘Pepito Manaloto.’ Proud mom din siya nina Yzabel at Micael.
Nakatrabaho ni Kuya Wil si Rufa Mae Quinto nang lumipat ang programa nito sa Kapatid network. Mula 'Wil Time Bigtime' hanggang 'Wowowillie' ay nagsilbing co-host ni Willie ang komedyante. Sunod-sunod ang blessing sa buhay ni Rufa dahil matapos ang kanilang kasal ni Trevor Magallanes ay dumating ang kanilang panganay na anak na si Alexandria Magallanes.
Si Miss Universe 2013 third runner-up Ariella Arida ay naging co-host din ni Willie sa 'Wowowin' mula 2016 hanggang 2017. Hindi man siya madalas mapanood sa TV ngayon, patuloy pa rin siya sa pagiging isang modelo at endorser.
Maituturing na biggest comeback sa TV ni Iwa Moto ang kanyang pagiging host sa ‘Wil Time Bigtime.’ Sa ngayon ay hindi niya priority ang buhay-artista dahil isa siyang full-time mom sa kanyang anak na si Hiromi.
Marami ang nagulat nang maging co-host ni Willie ang matahimik at mahinhin na si Shalani Soledad. Kasal na siya ngayon sa kapwa politician na si former Cong. Roman Romulo ngunit pareho silang walang hinahawakang posisyon sa gobyerno.
Isa pang beauty queen ang naging co-host ni Kuya Wil sa katauhan ni Cindy Miranda, ang nanalong Binibining Pilipinas Tourism noong 2013. Patuloy ang kanyang pagmomodelo bilang isang Viva at Mercator artist.
Minsan ding napanood si Mo Twister sa ‘Wil Time Bigtime.’ Patuloy pa rin siyang mapapakinggang ngayon bilang isang DJ sa isang FM station ngunit masasabing lumagay na siya sa tahimik sa pagkakaroon ng sarili niyang pamilya.
Matapos ang kanyang pagiging host sa ‘Wil Time Bigtime’ at ‘Wowowillie’ ay nanatiling Kapatid si Grace Lee.
Bago ang kanyang mga nakakalokang posts sa Twitter , sa 'Wowowillie' muna nagpatawa si Ethel Booba. Hindi man siya madalas mapanood ngayon sa TV, busy ang singer-comedienne sa international shows at pag-promote ng kanyang librong #Charotism.
Naging co-host din ni Willie ang 'StarStruck' alumna na si Arci Munoz sa 'Wowowillie.' Balanced ang oras ni Arci ngayon sa pag-aartista at pagiging isang musikero.
Sino mag-aakalang ang rapper na si Abra ay nakatrabaho rin ni Kuya Wil bilang kanyang co-host. Ang kanyang pagiging isang makata, songwriter, battle emcee, at OPM ambassador ay litaw sa kanyang musika.
Ang miyembro ng ‘Pretty Young Thing’ na si Ava Jugueta ay naging ‘Wil Time Bigtime’ co-host din ni Willie. Ngayon, mas nakatuon ang kanyang oras sa pagbabanda.
Isa ang pagiging host ng 'Wil Time Bigtime' sa mga ginampanang roles ni Nina na layo sa pagkanta, ngunit hanggang ngayon ay patuloy ang kanyang pamamayagpag bilang 'Soul Siren.'
Naging bahagi rin si Ate Gay ng ‘Wil Time Bigtime.’ Walang kupas pa rin ang kanyang pagpapatawa bilang isang performer at stand-up comedian.
Dating contestant sa 'Willie of Fortune' segment ni Willie Revillame si Yvette Corral bago siya maging dancer at maging co-host sa 'Wowowin.' Patuloy pa rin ang kanyang pagsayaw at pag-host kahit bihira na siyang mapanood sa TV.
Ang aspiring beauty queen na si Kimchi o Janelle Tee sa totoong buhay ay naging co-host din ni Willie Revillame sa 'Wowowin.' Ngayon ay abala si Kimchi sa pagiging host sa isang Filipino-Chinese program sa ibang istasyon, at pagiging isang entrepreneur.
Matapos sumali bilang 'Willie of Fortune' contestant ay inimbitahan ni Willie na maging co-host niya si Tekla sa 'Wowowin.' Hindi man siya bahagi ng Kapuso variety game show ngayon, nagpapasalamat pa rin si Tekla kay Kuya Wil at nananatiling Kapuso. Ang komedyante ay bumida na sa digital show na 'The Boobay and Tekla Show' at sa Kapuso rom-com na 'Inday Will Always Love You.'
Mas nakilala si Donita Nose nang maging bahagi siya ng 'Wowowin' bilang co-host ni Willie. Hindi man napapanood si Donita Nose ngayon, tumatanaw pa rin siya ng utang na loob kay Kuya Wil dahil nabuksan nito ang ilan pang oportunidad para sa komedyante. Siya ay nag-ge-guest ngayon sa ilang Kapuso shows tulad ng 'Celebrity Bluff' at 'All-Star Videoke.'