Ilaban Natin 'Yan: Mister na adik sa sex, nananakit kapag tinatanggihan ni misis? Si misis, may ibang karelasyon daw?

Mahilig bang mangalabit ang iyong mister? Normal naman sa mag-asawa ang magtalik o maglabing-labing. Ayon sa nakararami, isa nga raw ito sa nagpapatibay ng pagsasama ng mag-asawa.

Pero paano kung si misis ay tinatanggihan si mister at nauuwi ito sa pananakit? May obligasyon ba si misis na pagbigyan palagi si mister? At may pananagutan ba sa batas ang mister na nambubugbog kapag tinatanggihan ito sa sex?

Ito ang mga katanungan na sasagutin sa episode ng Ilaban Natin 'Yan na pinamagatang "Hayok."

Matapos ang manalo sa ratings ang episode last Saturday kung saan pinagharap sina Ed Calauag at ang kanyang bashers, isa na namang kaabang-abang na episode ang handog ng Ilaban Natin 'Yan ngayong Sabado.

Sa "Hayok" episode ngayong Sabado, isasadula ng Kapuso stars at Eat Bulaga Dabarkads na sina Ruby Rodriguez at Anjo Yllana ang istorya ng mag-asawang sina Karen at Christopher.

Ang misis na si Karen ay dudulog sa Ate ng Bayan na si Vicky Morales dahil 'di umano'y sinasaktan siya ng kanyang mister na si Christopher tuwing tumatanggi raw siyang makipagtalik dito.

At ayon pa kay Karen, kaya raw siya tumatanggi ay dahil masyado raw adik sa sex ang kanyang mister.

Si Christopher naman ay may isyu rin na ibinabato kay Karen. Meron daw kasing ibang karelasyon ang kanyang misis. Totoo kaya ito? At ito ba ang tunay na dahilan kung bakit tumatanggi si Karen sa kanya?

Alamin ang mga kasagutan sa paghaharap ng mag-asawang sina Karen at Christopher ngayong Sabado sa Ilaban Natin 'Yan, alas-kuwatro ng hapon, pagkatapos ng Tadhana sa GMA-7.