Lani Misalucha, honored to be part of the TOFA 100 Most Influential list

Hindi inaasahan ng Asia's Nightingale na si Lani Misalucha na mapapabilang siya sa The Outstanding Filipinos in America (TOFA) Awards's 100 Most Influential list.

Kuwento niya sa virtual media conference ng The Clash Season 3, hindi siya makapaniwala nang mapili siya bilang honoree ng organisasyon kasama ang ilang bigating personalidad gaya nina Manny Pacquiao, Lea Salonga, Monique Lhuillier, at Bruno Mars.

"Sa totoo lang, 'di ko nga alam kung bakit nila ko sinali do'n. Talaga? Sigurado ba kayo?" aniya.

"Kasi biro mo, sino ba naman 'yung mga kasabayan ko ro'n, as in 'yung mga malalakas and malalaking tao.

"Mga shaker, mover, mga maimpluwensyang tao talaga, as in 'yung mga tao sa New York.

"Parang, 'di ba, pwede sa iba na lang ako," biro ni Lani.

Nagpasalamat naman si Lani sa pagkilala sa kanya ng TOFA.

"Pero I really am honestly, sincerely very honored and if they think that, you know, pwede naman pala 'ko isama, then thank you.

"Maraming, maraming salamat. Just really honored to be included in the top 100 of the Filipino-American influencers."

Ginagawaran ng TOFA Awards ang mga natatanging Pinoy sa Amerika na nakilala sa larangan ng media, business and entrepreneurship, education and research, fashion, culinary, at public service.

Ang TOFA awarding ceremony ay gaganapin sa October 31 via online.

Samantala, muling matutunghayan si Lani bilang The Clash judge sa ikatlong season ng programa na simula nang mapapanood sa Sabado, October 3.