Buhay ni Ramon Revilla Sr., tampok sa dokumentaryong 'Ramon'

Nagtipon-tipon ang mga kaibigan, katrabaho, at mahal sa buhay ni Agimat of Philippine Cinema Ramon Revilla Sr. para alalahanin ang kanyang buhay sa dokumentaryong pinamagatang Ramon.

Tampok dito ang istorya ng kanyang kabataan hanggang sa kanyang simula at pagsikat bilang aktor at pulitiko.

Ipinanganak bilang José Acuña Bautista noong March 8, 1927, pero mas nakilala siya sa kanyang screen name na Ramon Revilla.

Matapos ang mahabang karera sa showbiz at pati sa pulitika, pumanaw siya sa edad na 93 noong June 26, 2020.

Sa dokumentaryong Ramon, mas makikilala pa siya bilang patriarch ng angkang Revilla. Makikita ang kanyang malaking impluwensya sa pamilya dahil marami sa kanyang mga anak at apo ang sumunod sa kanyang mga yapak sa parehong larangan ng showbiz at pulitika.

Ilan sa kanyang mga kaibigan din ang magbabahagi ng kanilang mga alaala at naging karanasan kasama ang dating senador, pati na ang kanyang kontribusyon sa pelikulang Pilipino.

Ang kanyang apong si Bryan Revilla ang nagsilbing direktor ng dokumentaryo.

Huwag palamapasin ang Ramon ngayong October 25, 9:00 PM sa GMA News TV.