Gabby Concepcion, excited sa tambalan nila ni Sanya Lopez sa 'First Yaya'

Malapit nang magsimula ang lock-in taping para sa bagong Kapuso primetime series na First Yaya na pagbibidahan nina Gabby Concepcion at Sanya Lopez.

Ito ang unang beses na magtatambal ang dalawang Kapuso stars at hindi lang fans nila ang excited nang mapanood sila sa screen.

Nang makapanayam ng 24 Oras, ibinahagi ni Gabby na pati siya ay “excited” na ring makatrabaho si Sanya.

“Marami na akong narinig na maganda tungkol sa kanya. Malaki ang fanbase niya and gusto kong makarating sa kanyang fans na I'm really happy na makakasama ko ang idol ninyo.

“It'll be a surprise. Hindi ko pa siya nakikila in person. Okay naman siya sa Zoom. Ang ganda naman ng energy na nakikita ko, so, I'm excited,” aniya.

Ayon kay Gabby, ang First Yaya ay iikot sa istorya ng isang pulitiko “behind the scenes” ng kanyang posisyon.

“Ang pinaka-tema niya is 'yung relationship nu'ng politician na 'yon, nu'ng presidente na 'yon behind the scenes. Sa image kasi natin ang mga presidente, tough, pero may puso rin sila, e, and 'yun ang gusto nating makita,” dagdag pa niya.

Samantala, tatagal ang lock-in taping para sa First Yaya hanggang bago mag-Pasko kaya sa unang pagkakataon in recent years ay sa Pilipinas sasalubingin ng aktor ang holiday season.

“First time ko lang mase-celebrate ang Christmas dito kasi every year umaalis kami. Pero ngayon first time naming ma-experience na dito lang sa bahay since 2008. Iba rin siya. Iba ring thrill siya kasi something new again,” aniya.