Richard Yap names Kapuso actresses he'd like to work with

Certified Kapuso na ang kinakikiligang leading man na si Richard Yap matapos nitong pumirma ng management contract sa GMA Artist Center (GMAAC) kahapon, December 16.

Dumalo sa contract signing ng aktor at recording artist sina GMAAC Senior Talent Manager Joy Marcelo, GMAAC Assistant Vice President and Head for Talent Imaging and Marketing Unit Simoun Ferrer, GMA Senior Vice President for Entertainment Group Lilybeth G. Rasonable, at co-manager ni Richard na si Kate Valenzuela.

Sa panayam ni Nelson Canlas sa 24 Oras, ibinahagi ni Richard na noong isang taon pa siya nakatanggap ng offer na project mula sa programa.

“I feel overwhelmed, actually, kasi parang this was a long time in the making.

"I was offered a project late last year pero hindi nagko-coincide 'yung schedules namin. So, parang at last nangyari rin. Very grateful and very thankful,” aniya.

Ayon kay GMA Senior Vice President for Entertainment Group Lilybeth G. Rasonable, may inihahanda nang soap opera para kay Richard at ipalalabas ito sa susunod na taon.

“First of all, marami nang gustong mag-guest sa kanya but next year you can expect him to be on primetime. We're already cooking up a soap opera,” aniya.

Silipin ang mga kaganapan sa contract signing ni Richard Yap sa gallery na ito:

Samantala, pinangalanan din ng bagong Kapuso talent ang ilan sa mga Kapuso stars na gusto niyang makatrabaho na hindi pa niya nakakasama sa mga nagdaan niyang project.

“Marami actually that I look up to like Heart Evangelista, Marian Rivera, Lovi Poe, Rhian Ramos, Solenn Heussaff and... ang dami actually, e. Pero top of mind 'yun muna. I've worked with Jean Garcia before and we had a great time doing a movie together,” aniya.

Bukod sa inihahandang primetime show, bibida rin si Richard sa isang episode ng comedy anthology na Dear Uge Presents at tatampok din sa late-night comedy-variety program na The Boobay and Tekla Show.

Dagdag pa rito, ikinagulat daw ng aktor ang mainit na pagtanggap sa kanya ng Kapuso fans, na positibo ang naging reaksyon sa paglipat niya sa network.

"I was surprised kasi akala ko hindi ako kilala ng mga Kapuso fans. It turns out na kilala rin pala nila ako,” pahayag niya nang eksklusibong makapanayam ng GMANetwork.com nitong Martes, December 15.

Aniya pa, bukod sa paggawa ng romantic-comedy programs ay susubukan din niya umanong sumabak sa iba pang genre gaya ng comedy at action-adventure shows.

“I think you'd expect me to do a lot of other genres aside from romcom if given a chance and of course, I'd give everything my all for the Kapuso fans and the Kapuso family,” sabi pa ni Richard.

Lubos din ang pasasalamat ng aktor sa GMA Network.

“Incredibly thankful and blessed to be welcomed into my new home.

“After a year of so many trials there is always something to be thankful for. Thankful for new beginnings in my new home network as a Kapuso.

“Thank you for the warm welcome my Kapuso family especially to Ms. Lilibeth Rasonable, Mr. Simoun Ferrer and Ms. Joy Marcelo and to my Team RY Jan Navarro and Rod Flores and of course Kate Valenzuela,” post ni Richard sa social media.