Dennis Trillo, Alden Richards, at Ruru Madrid, nais maka-kissing scene ni Herlene 'Sexy Hipon' Budol

Sunud-sunod ang mga proyekto ngayon ng dating Wowowin host na si Herlene "Sexy Hipon" Budol sa GMA Network.

Sa katunayan nito lamang Sabado, October 23, tampok ang talambuhay ni Herlene sa real-life drama anthology na #MPK o Magpakailanman na siya mismo ang gumanap.

Aminado si Herlene na ito raw ang itunuturing niyang first major role at talagang nahirapan siya kahit na sariling kwento niya ito.

"Mas mahirap palang gampanan yung sarili mo lalo na pag nagpa-flashback sa 'yo yung mga throwback [past experiences] na ayaw mo nang magbalik," kwento niya.

Dagdag pa niya, "Major role, kasi buhay ko, ang hirap pala nun yung gampanan mo yung sarili mo, bilang ikaw talaga. Inisip ko nga, e, ito na naman yung sakit ng ulo ko, naka-move on na ako dito, naalala ko na naman."

Sa kabila naman ng kabi-kabilang proyekto, sinabi ng aktres sa isang Facebook live video kamakailan na hindi pa raw siya para sumabak sa mga kissing scene.

"Ayoko, nahihiya ako, Hindi pa ako masyadong marunong mag-toothbrush. Hindi ko ma-imagine na may ka-kissing scene ako." natatawang sinabi ni Herlene.

Pero kung kakailanganin daw ay may mga Kapuso actors siyang gustong maka-eksena.

"Ayoko. Ayoko. Joke lang! pero si Dennis Trillo, Ruru Madrid at Alden Richards...kinikilig ako." masayang sinabi ng aktres.

Inamin din ng young comedienne na gusto niya ring makatrabaho si Kapuso Primetime Queen Marian Rivera.

"Idol ko yun, dati kasi nanonood ako ng Darna, so ano si Marian Rivera. Dati umiiyak pa ako, sabi ko, 'Gusto ko maging Darna, bakit ayaw niyo ako gawing Darna,' pero 12 years old pa lang ako noon." kwento pa niya.

Sa ngayon mapapanood din si Herlene sa drama anthology series na Stories from the Heart: Never Say Goodbye, Lunes hanggang Biyernes, 3:25 p.m. sa GMA Afternoon Prime.

Samantala, mas kilalanin pa si Herlene Budol aka "Hipon Girl" sa gallery na ito: