Thai hit drama 'The Gifted: Graduation,' mapapanood na sa Heart of Asia

Magbabalik na sa Heart of Asia ang pinakaastig na tropang minahal ninyo sa science fantasy series na The Gifted.

Samahan sila at mas kilalanin pa ang kanilang mga special powers kasama ang bagong henerasyon ng “Gifted Class” na tiyak na dapat niyong abangan.

Itutuloy sa The Gifted: Graduation ang kuwento ng grupo makalipas ang dalawang taon.

Makikilala ninyo na si Time (Nattawat Finkler), ang isang 10th grade student sa Ritdha High School na nais makabilang sa “Gifted Program.” Matapos malaman na nabuwag na ang grupo, gagawa siya ng paraan para maibalik ang programang ito.

Muli silang magsasanib puwersa para kalabanin ang direktor ng school at tuluyan nang mapabagsak ang kaniyang mapaniil na sistema.

Pero magtatagumpay kaya sila?

Bukod sa tagisan ng kani-kanilang mga special abilities, may uusbong din na mga kaabang-abang na alitan at pag-iibigan sa pagitan ng magkakabarkada.

Ngayong Disyembre, huwag palampasin ang pagkakataon na mapanood ang The Gifted: Graduation dito lamang sa GMA Heart of Asia.