Pumirma na ng panibagong kontrata ang Primetime Queen na si Marian Rivera nitong February 5. Nagkaroon din ng media conference ang Kapuso star kasama ang mga kaibigan sa press matapos ang contract signing.
Ayon kay Marian, “Proud to be Kapuso talaga ako, forever.”
Bakit espesyal ang GMA sa puso ni Marian? Aniya, “Una sa lahat sila ang nagbigay sa akin ng break. Pangalawa, forever kong tatanawin na utang na loob na kung ano man ang meron na ako ngayon is because of GMA.”
Dagdag ni Marian, “Binigay na nang lahat ng GMA kaya wala akong dahilan para hindi ako manatili rito.”
Kasama ni Marian ang GMA sa lahat ng importanteng kaganapan sa kanyang buhay. “Malaki ang pasasalamat ko sa GMA kasi sobra sobra 'yung tiwala nila after all, nagpakasal, nagkaanak, then binibigyan pa rin ako ng magandang proyekto.”
Balik pelikula naman si Marian na handa na mag-shoot para sa isang indie film sa susunod na buwan.
Napag-uusapan daw nila lagi ni Dingdong ang kanilang mga career plans. “We support each other, sinasabi kung ano'ng mga projects [ko], ano'ng mga projects niya. Siguro natural lang 'yun para at least transparent kami sa lahat ng mga ginagawa namin bilang mag-asawa kaming dalawa.”
Lahat daw ng naging karakter ni Marian ay mahalaga. “Naku, ang daming unforgettable, lahat ng 'yan siguro, kung 'di ko napagdaanan hindi ako buong-buo bilang artista sa ngayon.”