Kirsten Gonzales, hindi malilimutan ang kanyang first-ever TV guest appearance sa GMA

Ibinahagi ni Kapuso actress at Sparkada member Kirsten Gonzales na hindi niya malilimutan ang kanyang pinakaunang TV guest appearance sa GMA.

Matatandaan na napanood ang aktres sa episode na “Your House, My Home” ng weekend anthology series na Regal Studio Presents. Nakasama niya rito sina Kapuso stars Ken Chan at Rita Daniela, na gumanap bilang sina Jarvis at Ellie.

“Hindi ko po malilimutan is 'yung first-ever guesting ko po here sa GMA. Kasama ko po si Ms. Rita Daniela and si Sir Ken Chan, at kasama ko po agad mga prime na artist and kinabahan po ako pero they made me feel welcomed po,” kwento niya sa virtual media conference ng Sparkada kamakailan.

Ayon pa sa young actress, marami siyang natutunan mula sa kanyang co-stars.

Aniya, “Kahit 'yung mga basic po na things na need ko sa taping and sa pag-acting. Wala po akong alam noong time na 'yon, so sila po nagturo sa akin and hindi ko po talaga sila malimutan. And I hope po talaga na maka-work ko po sila again.”

Bukod dito, mayroon ding mahalagang advice na natutunan si Kirsten mula kina Ken at Rita.

“Sleep is your best friend. When you have time to sleep, rest po talaga para ma-refresh po 'yung mind mo and always come prepared.

“If binigay na po sa'yo 'yung script. Read the whole script kahit na hindi ka po kasama do'n, read it po talaga and come prepared. And sabi po nila, unahin po talaga 'yung sarili mo kasi if hindi ka po prepared, hindi mo magi-give 'yung 100% mo,” pagbabahagi niya.

Kabilang si Kirsten sa upcoming kilig series na Luv Is: Caught In His Arms na pinagbibidahan nina Sparkle sweethearts Allen Ansay at Sofia Pablo.

Kasama rin dito ang ilang Sparkada members na sina Vince Maristela, Raheel Bhyria, Sean Lucas, Michael Sager, Caitlyn Stave, Cheska Fausto, at Tanya Ramos.

SAMANTALA, SILIPIN ANG STUNNING LOOKS NG SPARKADA NOONG GMA THANKSGIVING GALA SA GALLERY NA ITO.