Itinanghal ang 10-year-old child performer na si Althea Ruedas ng Antipolo City bilang "Little Miss Diva" grand winner ng 'Eat Bulaga.'
Nagpamalas ng kabibuhan at talento sa pagkanta si Althea sa grand finals ng nasabing talent search.
Hindi na bago kay Althea sa ganitong mga kompetisyon dahil sumali na rin siya sa "Little Miss Philippines" ng longest-running noontime show sa bansa.
Anim na taong gulang noon si Althea nang magwaging first runner-up sa kiddie pageant ng 'Eat Bulaga' noong 2019. Si CJ Keith Longcanaya ang itinanghal na "Little Miss Philippines 2019."
Pamilyar sa marami si Althea dahil isa rin itong artista. Isa nga sa mga pelikulang ginawa niya ang hit Netflix family drama na 'Doll House' na pinagbidahan nila ni Baron Geisler.
Kilalanin pa ang "Little Miss Diva" champ na si Althea Ruedas sa gallery na ito:
Si Althea Ruedas at ang kanyang pamilya ay nakatira sa Antipolo City.
Dalawang taong gulang lang noon si Althea nang magsimula siyang kumanta. Sa murang edad, kabisado na niya ang folk song na "Bahay Kubo."
May sariling YouTube channel si Althea na mina-manage ng kanyang mga magulang. Mayroon na itong 3,400 subscribers at 125,000 views. Dito mapapanood ang ilang song covers ni Althea simula noong siya ay dalawang taong gulang pa lang.
Ilang beses na ring kumanta sa public events si Althea. Nakapag-perform na siya sa isang event sa kanilang barangay kung saan inawit niya ang "Isang Lahi." Nagkaroon din siya ng special number sa isang travel campaign launch sa kanilang probinsya kung saan kinanta niya ang "Salamat Musika."
Sa murang edad, naging laman na ng mga singing contest si Althea.
Isa ring TV commercial, digital ad, at pint model si Althea. Dalawang beses siyang lumabas sa TV commercial ng Jollibee. Three years old lamang noon si Althea nang unang beses siyang mapanood sa ad ng fast food brand. Apat na taong gulang naman siya noon nang tumampok siya sa ad ng Smart Travel WiFi noong 2017. Nakita rin siya sa isang ad ng Argentina Beef Loaf at CDO Idol Cheesedog.
Pitong taon naman si Althea nang lumabas siya sa pelikula. Gumanap siyang Nathalie sa 2019 movie na 'Silly Red Shoes.' Noong 2022, napanood naman siya sa Cinemalaya entry na 'Bakit 'Di Mo Sabihin.' Napanood din siya sa ilang palabas sa kabilang istasyon.
Noong 2022, bumida siya sa hit Netflix family drama na 'Doll House' kasama si Baron Geisler. Nanguna sa top ten movies ng Netflix Philippines ang nasabing pelikula ilang araw matapos i-release. Dito ay napanood si Althea bilang Yumi, na napag-alamang long-lost daughter ng troubled musician na si Rustin (Baron) nang magtrabaho ito bilang babysitter ni Yumi.
Bukod sa pagkanta, mahilig din si Althea tumugtog ng ukulele, magsulat ng kanta, at magsulat ng kuwento. Live streamer din siya sa Kumu.
Nag-improve ang boses ni Althea dahil sa kanyang consistent sa pagpa-practice.
Lagi niyang ka-jamming ang kanyang Daddy Eggy na nag-impluwensiya sa kanyang kumanta.
Bago pa maging "Little Miss Diva," naging Ever Kiddie Star siya noong 2016.
Isa si Althea sa mga pinarangalan sa 6th Asia Pacific Luminare Awards Night noong 2022.
Sa walong finalists ng kiddie talent competition ng 'Eat Bulaga' na "Little Miss Diva," si Althea ang itinanghal na panalo at nakapag-uwi ng PhP 500,000 bilang kanyang cash prize. Inawit niya sa grand finals ang "Pangarap Na Bituin" ni Megastar Sharon Cuneta. May sing-and-dance number din siya sa saliw ng kantang "Proud Mary" na pinasikat ng American musical duo na sina Ike and Tina Turner.