Aminado ang comediennes at bida ng Metro Manila Film Festival (MMFF) film na Becky and Badette na sina Pokwang at Eugene Domingo na kahit in real life ay malapit na magkaibigan silang dalawa. Kaya naman, hindi takot magbigay ng advice si Eugene sa kaniyang kaibigan, lalo na tungkol sa relationship at love.
Sa guesting nila sa Fast Talk with Boy Abunda nitong Miyerkules, November 29, ibinahagi ni Pokwang na madalas siyang makarinig ng “sermon” mula kay Eugene.
“In fairness naman dito kay Pokwang, nakikinig naman siya. Kaya lang minsan, hindi ko na mapulis kasi biglaan ko na lang nakikita galit na galit na naman siya sa post niya, may kaaway na naman,” pagbabahagi ni Eugene.
Nang tanungin naman si Pokwang kung naniniwala pa siya sa pag-ibig, ang sagot ng actress, “Oo, lalo na at nandiyaan pa rin ang mga anak ko. Pag-ibig sa mga anak.”
Ngunit nang tanungin siya kung paano para sa lalaki, sinabi niyang “Wala muna, wala muna.”
Tingan sa gallery na ito kung papaano binigyan ni Eugene ng relationship advice ang kaibigang si Pokwang:
Ang pangunahing payo ni Eugene kay Pokwang ay 'wag itong sumuko sa pag-ibig.
Ibinahagi rin ni Eugene na hindi totoo ang sinasabi ng ilan na "kaya ko, kaya ko, ako lang mag-isa." Paliwanag niya, "Darating at darating ang panahon na 'yung dalawa mong anak, magkakaroon rin ng sarili nilang pamilya."
Dagdag pa ni Eugene, importante din sa kaniya, at sa ibang mga kaibigan ni Pokwang, na may kasama ito sa pagtanda.
Para kay Pokwang, sa ngayon, mas gusto niyang mag-focus na lang muna sa kaniyang mga anak at magbigay ng oras sa kanila.
Ibinahagi rin ni Pokwang na sa taong 2024, mas gusto niyang mag-focus sa negosyo. Dagdag nito ay magpapayaman na lang muna siya.
Ngunit nilinaw ni Pokwang na pinagdarasal pa rin niya ang mahanap ang tunay na pag-ibig. "Kung hindi lang din galing sa kaniya (Lord), 'wag na," sabi nito.
Binigyan naman din ni Eugene ng assurance ang kaibigan. Sabi niya, "Meron totoong magmamahal saýo, dadating 'yan."
Samantala, tinanong naman sila ng host na si Tito Boy Abunda kung tanggap ba nila ang pagsisinungaling o hindi. Ang sagot nila, "Depende." Paliwanag ni Pokwang, "Depende siguro, kung anong klaseng lie, kung ano 'yung reason bakit siya nag-lie."
Ayon kay Eugene, kahit itago ang pagsisinungaling ay lalabas at lalabas din ito "para rin sa sarili mong kaluwagan."
Para naman kay Pokwang, kahit pa tanggap niya ang pagsisinungaling ng isang tao, importante rin na matanggap niya ang dahilan nito.