Nakakuwentuhan ng King of Talk na si Boy Abunda sa programang Fast Talk with Boy Abunda noong Martes, December 5, ang Sparkada stars na sina Vince Maristela, Caitlyn Stave, at Kim Perez.
Nakilala sina Vince, Caitlyn, at Kim bilang bahagi ng Sparkada, na ini-launch ng Sparkle GMA Artist Center noong April 2022. Sa loob lamang ng mahigit isang taon, sunud-sunod ang naging proyekto ng tatlong Sparkle artists na, anila, talagang kanilang ipinagpapasalamat.
Ibinahagi rin nina Vince, Caitlyn, at Kim ang kanilang mga naging experience sa audition sa Sparkle at maging ang mga artistang kinabahan silang makaeksena. Sinagot din ng tatlo ang mga gagawin nila kung sakaling hindi sila magtagumpay sa showbiz.
Tingnan ang ilang behind-the-scenes photos nina Vince, Caitlyn, at Kim sa Fast Talk With Boy Abunda at balikan ang ilan sa kanilang mga napag-usapan kasama si Boy Abunda sa gallery na ito:
Nakasama sa Fast Talk with Boy Abunda noong Martes, December 5, ang Sparkada stars na sina Vince Maristela, Caitlyn Stave, at Kim Perez.
Thankful at blessed sina Vince Maristela, Caitlyn Stave, at Kim Perez sa sunud-sunod na proyektong dumarating sa kanila simula nang mai-launch ng Sparkle GMA Artist Center bilang bahagi ng Sparkada noong April 2022.
Naging bahagi si Vince ng cast ng Luv Is: Caught in His Arms at napapanood naman ngayon bilang Memot sa primetime series na Love Before Sunrise. Pagbabahagi ni Vince, "Super blessed like this year nabigyan kami ng project which is 'yung 'Luv Is' and then may sumunod agad 'Love Before Sunrise.' So, super thankful and super blessed with the year."
Naging busy rin si Caitlyn Stave sa projects na dumating sa kanya. Napanood si Caitlyn sa Luv Is: Caught in His Arms at Zero Kilometers Away. Makakasama rin siya sa My Guardian Alien, na pagbibidahan ni Primetime Queen Marian Rivera. Sabi niya, "It's been super fast, actually... Very busy, with Vince I also did 'yung 'Luv Is,' then after that, I have my new show with Marian Rivera. I'm so excited."
Mas nakilala naman si Kim Perez nang maging isa sa love interests ni Ashley Ortega sa Philippines' first-ever figure skating series na Hearts On Ice. Ngayon, napapanood siya bilang Mattias sa Black Rider. Ani ng aktor, "Sobra, sobrang saya kasi itong Sparkada family ito for me. Itong mga nakaraan talagang bini-blessed ako ni Lord, talagang sobrang [thankful] ako. Nagkaroon ako ng family sa Unang Hirit and another family rito sa Hearts On Ice. At thankful talaga ako dahil nasundan pa iyon na Black Rider."
Sa pakikipagkuwetuhan kay Boy Abunda, binalikan din nina Vince Maristela, Caitlyn Stave, at Kim Perez ang kanilang naging audition sa Sparkada. Ipinakita rin nina Vince at Kim ang naging acting pieces nila noong nag-audition sa Sparkle.
Isa-isa ring sumalang sa "Fast Talk" sina Vince Maristela, Caitlyn Stave, at Kim Perez.
Sa "Fast Talk," sinabi ni Vince Maristela na si Barbie Forteza ang artistang kinabahan siyang makaeksena. Si Cheska [Fausto] naman ang aktres na gusto niyang maka-love team. At dream niyang maka-fight scene si Ruru Madrid.
Para naman kay Kim Perez, si Ashley Ortega ang artistang kinabahan siyang makaeksena.
Hindi naman daw maiwasan ni Caitlyn Stave na matakot kay Marian Rivera at Kyline Alcantara. Sabi niya, "I'm scared kay Ms. Marian po kasi she's so good. I'm just new here so I'm worried."
Ibinahagi rin nina Vince Maristela, Caitlyn Stave, at Kim Perez ang kanilang gagawin kung sakaling hindi magtagumpay sa showbiz. Sabi ni Vince, "Madami pa namang ibang opportunities since like I'm still growing up and I'm sure may darating pa riyan. Since kaka-graduate ko pa lang din, I know na mayroon akong pinanghahawakan na diploma."
Para naman kay Caitlyn Stave, babalik siya sa pag-aaral kung sakali mang hindi siya magtagumpay sa showbiz.
Kung sakali namang maging matagumpay bilang artista, ipinapangako ni Kim Perez sa sarili na bibilhan niya ng bahay ang kanyang pamilya. Nais din ng aktor na magkaroon ng sariling farm. Kung sakali namang hindi siya palarin sa showbiz ay itutuloy niya ang pag-aaral sa kolehiyo.