Pagbibidahan nina Kapuso Primetime Princess Barbie Forteza, Kapuso hunk Paul Salas, at renowned actor Christopher de Leon ang ikatlong mini-series na handog ng 'I Can See You' Season 2, ang “The Lookout.”
Ang mini-series ay tungkol kay Emma, ang magician assistant na nagdesisyong kumapit sa patalim para makahanap ng perang ipangtutustos sa medical bills ng kanyang may sakit na kapatid.
Dahil wala nang ibang maisip na paraan na pagkukunan ng pera, pumayag si Emma na maging kasabwat at lookout sa plano ng kababata niyang si Dalo na pagnakawan ang pamilya Penuliar, ang mayamang pamilyang nakatira sa village malapit sa squatters area na kanilang tinitirhan.
Laking-gulat na lamang ng magpinsan nang pagpasok sa bahay ng mga Penuliar ay tumambad sa kanila ang wala nang buhay na kasambahay ng mga ito.
Paano nila haharapin ang sitwayson? Paano sila makalalabas sa bahay ng mga Penuliar nang ligtas?
Ang versatile Kapuso actress na si Barbie Forteza ang gaganap bilang si Emma. Nakatira siya sa squatter area katabi ng village ng mga Penuliar. Wala siyang pinipiling trabaho para may maipangtustos sa pangangailangan nila ng kapatid niya.
Si Kapuso hunk Paul Salas naman ang papapel sa karakter ni Marius Penuliar, anak ng mag-asawang Dr. Robert Penuliar at Tessa Penuliar. Mababa ang tingin niya sa mga mahihirap. Napilay si Marius dahil sa sinapit niyang aksidente.
Ang beteranong at tinitingalang aktor naman si Christopher de Leon ang gaganap sa role ni Dr. Robert Penuliar, ang prominenteng doktor sa isang kilalang ospital.
Kasama rin sa cast ang aktor na si Adrian Alandy bilang si Jason “Lakay” Bautista. Isa siyang ex-military soldier na ngayon ay isang gun-for-hire na. May post-traumatic stress disorder (PTSD) din ito.
Isa ring doktor si Randy Penuliar at nakababatang kapatid ni Dr. Robert Penuliar. Aksidente niyang mapapatay ang isang pasyente dahil sa malpractice ngunit palalabasin niyang natural cause ang ikinamatay nito. Gagampanan ni Arthur Solinap ang naturang role.
Ang aktres na si Marina Benipayo si Tessa Penuliar, ang asawa ni Dr. Robert. Matapobre ito at laging may reklamo sa mga taong nakatira sa squatter area katabi ng kanilang village.
Ang Kapuso young star naman na si Elijah Alejo ang gaganap na bunsong anak ng mga Penuliar, si Christine Penuliar. Malambing at malapit ito sa kuya niyang si Marius.
Si Kapuso heatthrob na si Luis Hontiveros si Dalo, ang kababata ni Emma na may lihim na pagtingin sa dalaga. Siya rin ang kasama ni Emma sa iba't ibang raket.
Si 'StarStruck' alum Ella Cristofani ang gaganap sa karakter ni Joanne Castro, kapatid ni Emma na may malubhang sakit.
Pasok din sa cast ng mini-series si Jana Trias bilang Yaya Minda, ang kasambay ng mga Penuliar. Siya rin ang nagbibigay ng tip kina Dalo at Emma sa tuwing may raket sa village.
May special participation din sa “The Lookout” si Benjie Paras bilang ang kapitan ng village at komunidad ng mga squatter.