Rhian Ramos, nahirapang mag-adjust sa new normal taping ng 'Truly. Madly. Deadly'

Marami ang nag-aabang sa “Truly. Madly. Deadly.” ang ikaapat na installment ng drama anthology na I Can See You na ipalalabas simula Lunes, October 19 sa GMA Telebabad.

Pinagbibidahan ito nina Kapuso Drama King Dennis Trillo, Kapuso Sweetheart Rhian Ramos, at Ultimate Star Jennylyn Mercado.

Ayon kay Rhian, kahit excited siyang muling umarte ay natakot pa rin siyang makihalubilo sa tao dahil sa banta ng COVID-19.

“Ang daming nagbago sa mundo since the last time na nakapag-taping ako. It's very different talaga. I was even asking Jen for a lot of tips because tapos na rin siyang mag-taping for 'Descendants of the Sun' and malapit na akong mag-taping for 'Love of My Life',” aniya.

Dagdag pa niya, kahit hindi ganoon kakumportable noong umpisa ay natutunan din niyang mag-adjust.

“I think it's very important na matuto tayo mag-adjust at matuto tayo kung paano ba sa new normal kasi hindi naman pwedeng maghihintay lang tayo na mawala 'yung pandemic or 'yung threat,” aniya.

Nawala rin ang takot na naramdaman ni Rhian dahil nakita niyang iniingatan ng network ang lahat ng production staff, crew at mga artistang nagbalik na sa trabaho.

“To be honest, mas malala 'yung in-expect ko. 'Yung in-expect ko is every time na after taping, mahihirapan pa magpa-swab after. Tapos hindi ko makukuha 'yung results, hindi ko alam kung kailan ko ulit makikita 'yung pamilya ko or something. Pero hindi naman ganu'n,” sabi pa ni Rhian.

Makakasama rin nila Rhian, Dennis at Jennylyn sa serye sina Jhoana Marie Tan at Ruby Rodriguez.

Mula sa direksyon ni Jorron Lee Monroy, mapapanood ang “Truly. Madly. Deadly” mula October 19 hanggang October 23, sa GMA Telebabad.