May bagong kinaiinisan ngayon sa primetime at ito ay walang iba kundi ang Love. Die. Repeat. actress na si Valeen Montenegro.
Huli ni Valeen ang galit ng viewers ng GMA Prime series kung saan gumaganap siya bilang Chloe, isa sa best friends ng bidang character na si Angela, na ginagampanan ni Jennylyn.
Para sa viewers ng Love. Die. Repeat., isang traydor si Chloe dahil may gusto ito sa asawa ni Angela na si Bernard, na ginagampanan ni Xian Lim.
Noong hindi pa magkakilala sina Angela at Bernard, naka-one night stand ng lalaki si Chloe sa Boracay. Tinamaan si Chloe kay Bernard na binansagan niyang "Boracay Boylet."
Nang magkahiwalay si Chloe at ang boyfriend niyang si Jerome (Ervic Vijandre), si Bernard ang nag-comfort sa kanya kahit pa third party ang una.
Ikinagalit nina Angela at Jessie (Ina Feleo) ang pagiging kabit ni Chloe kaya tinapos ng huli ang kanilang pagkakaibigan.
Higit na nabaling ang galit ni Chloe sa asawa ni Bernard dahil matagal na siyang may pagtingin sa lalaki. Sinisi pa ni Chloe si Angela kaya siya naging kabit.
Nang maging single ulit, inakit ni Chloe si Bernard kahit asawa pa ito ng kanyang best friend. Ang matindi pa, may nangyari muli sa kanila matapos ang kanilang one-night sa Boracay.
Tingnan ang iba pang kontrabida moments ni Valeen bilang Chloe sa Love. Die. Repeat. sa gallery na ito.
Bago pa magkakilala sina Angela at Bernard, naka-one-night stand ni Chloe si Bernard sa Boracay. Isinikreto nila ito alang-alang sa pagkakaibigan nina Chloe at Angela.
Ipinagtanggol ni Bernard si Chloe kay Dianne, ang asawa ng boyfriend ni Chloe na si Jerome. Pinagtakpan din niya ang katrabaho at sinabing hindi magiging kerida si Chloe dahil nobya niya ito.
Kahit na magkaibigan, hindi kinunsinti ni Angela ang pagiging kabit ni Chloe.
Nang maging single na ulit si Chloe, may nangyari na naman sa kanila ni Bernard.
Kinuha ni Chloe ang relo ni Bernard habang tulog ito matapos silang magsiping.
Inakit ni Chloe si Bernard habang sila ay nasa opisina pero hindi na nagpadala ang lalaki.
Nagtaka si Angela kung bakit hindi suot ni Bernard ang kanyang relo hanggang sa nakita niya ito sa desk ng kanyang mister, kalakip ng isang sweet letter na pinag-awayan ng mag-asawa. Pinagtakpan naman ni Isaac si Bernard kay Angela at sinabing sa kanya galing ang liham bilang katuwaan nila ni Bernard. Hindi naniwala si Angela dahil sulat-babae ang liham, kaya sinabi ni Bernard na pinasuyo ni Isaac kay Chloe na isulat ang liham.