Ahasan ng boyfriend. Ito ang kuwentong gaganapan nina Gabbi Garcia, Juancho Trivino at Mara Alberto sa episode ng ‘Love Hotline’ ngayong Biyernes, February 5.
Gaganap sina Gabbi Garcia at Mara Alberto bilang mag-best friends na sina Richelle Mangili at Lovely Zaragoza, habang si Juancho Trivino naman si Cristoffer Verbo, ang binatang pinag-aagawan nila.
Kaabang-abang ang magiging tambalan nina Gabbi Garcia at Juancho Trivino sa "Karibal Ko Ang Best Friend Ko" episode ng ‘Love Hotline.’
Nagkakilala sina Richelle at Cris, ang kaibigan ng kanyang best friend na si Lovely.
Nabuo ang mas malalim na pagtitinginan sa pagitan nila, at lumao’y naging magnobyo at magnobya.
Ang tamis naman niyan, Richelle at Cris!
Ngunit tuwing may problema sila, si Lovely ang takbuhan ni Cris hanggang sa nahulog na rin sila sa isa’t isa.
Lagot, nabuking sila ni Richelle!
Ahasan na ba ng boyfriend?
Sa pagtatapat nina Richelle at Lovely, mas matimbang ba ang kanilang pitong taong pagkakaibigan o ang nararamdaman nila para kay Cris?
Tutukan ang nakakakilig at nakakaiyak na love story nina Richelle, Cris at Lovely ngayong Biyernes, 5 P.M. sa ‘Love Hotline.’