Intense cooking battles, mapapanood sa 'Regal Studio Presents: Karinderya Queens'

Excited na sina Miss Universe Philippines 2016 Maxine Medina at Miss World Philippines 2019 2nd Princess Casie Banks na mapanood ng mga Kapuso ang "Karinderya Queens."

Ito ang bagong special mula sa weekend anthology na Regal Studio Presents.

Gaganap sina Maxine at Casie bilang rival karinderya owners na magpapatalbugan hindi lang sa pagluluto, kundi pati na rin sa pag-ibig.

"Sa Karinderya Queens, ako si Sushmita pero ang tawag sa 'kin ng tao, Sushi. Magaling akong magluto, competitive ako and higit sa lahat, ang aking karibal sa halos lahat ng bagay dito, si Maxine," pahayag ni Casie tungkol sa kanyang karakter sa ginanap na Kapuso Brigade Zoomustahan noong November 4.

"Ako naman si Dayanara Ochoa. Siyempre, isa 'kong karinderya queen. Lagi akong nakikipag kompitensiya kay Casie kasi gusto ko, sa akin lang lahat ng customer. Siyempre inaagaw niya sa akin, ayokong pumayag dahil siyempre 'di ba kailangan nating kumita? I'll do everything para lang kumain sa 'kin 'yung mga customers. Very competitive din ako. Hindi ako papatalo. Lahat ng kaya niyang gawin, gagawin ko," paliwanag naman ni Maxine tungkol sa kanyang karakter na si Dayanara or Yara for short.

Ayon sa dalawang beauty queens, mapapanood daw sa episode ang isang intense na cooking battle.

"May cooking scenes doon, sobrang intense. May specialty kasi kami. Si Sushi may specialty. Si Yara meron din. Abangan niyo 'yun. Abangan niyo din kung sino ang mananalo doon," ani Casie.

"Si Yara is very competitive and siyempre 'yung specialty niya makikita niyo doon sa show na ipapakita namin. Very intense 'to, kailangan niyong mapanood," dagdag ni Maxine.

Humanga naman daw si Casie sa ipinamalas na cooking skills ni Maxine sa mga eksena nila.

"Actually, nakita ko talaga, marunong and magaling magluto si Max. Nakita ko 'yun sa shoot," papuri ni Casie.

Ayon kay Maxine, natuto daw siyang magluto ngayong quarantine.

"Basta kailangan niyo panoorin para makita niyo kung gaano ako ka-pro," biro ni niya.

Makakasama nina Maxine at Casie sa episode si Derrick Monasterio na gaganap bilang Dante, ang bagong tricycle driver sa kanilang barangay at lalaking pag-aagawan nina Yara at Sushi.

Tunghayan ang intense cook-off ng beauty queens na sina Maxine at Casie sa "Karinderya Queens" sa Regal Studio Presents, November 7, 4:35 p.m. sa GMA.

Samantala, silipin ang ilang eksena mula sa episode sa gallery na ito: