Around GMA

Article Inside Page

Ikinuwento ni Richard Reynoso ang nangyari noon nang napabalitang niligawan niya si Lea Salonga.

Tanong ni Carmina Villarroel sa kilalang OPM singer sa Sarap, 'Di Ba?: "Totoo ba na noong kabataan mo, niligawan mo ang idol ko na si Ms. Lea Salonga? Saan umabot ang panliligaw mo?"

Diretsong sagot ni Richard, "Hindi ko niligawan."

Paliwanag pa ni Richard ay close sila noon ng highly acclaimed Broadway singer and actress.

"We were close friends. We were very, very, very close kasi kahit 'yung nanay namin nagkukuwentuhan din, close din."

Inilahad pa ng 90's Prince Of Ballad na hindi siya umabot sa panliligaw dahil sa intriga.

"Noong point na pupuwede sanang umabot doon, hindi umabot doon kasi pinasukan kami ng intriga. May tumawag sa akin, nag-i-interview tapos sinabi sa akin, tinatanong ako, kung gusto ko daw ba, kung nanliligaw daw ba ako."

"Sabi ko hindi pa. Tinatapos ko lang 'yung pag-aaral ko. Hindi pa," dugtong ni Richard.

Hindi naman inaasahan ni Richard ang lumabas na balita tungkol sa kanila ni Lea. Kuwento ni Richard, "Ang lumabas sa dyaryo, si Richard Reynoso hindi type si Lea Salonga. Mula noon nagkaano na. I wasn't given a chance. Wala akong pagkakataon para i-defend 'yun dahil wala tayong social media noon e."

Tanong pa ni Carmina ay kung naipaliwanag ba ni Richard ito kay Lea noon.

Sagot naman ng singer, "Hindi na, wala na akong chance kasi 'yun 'yung time na aalis na pala siya pa-Miss Saigon."

Ayon pa kay Richard, nakapag-usap din sila sa pamamagitan ng Facebook. Ani Richard, "Nakapag-usap naman kami sa FB (Facebook). Nagpalitan kami ng messages. Okay na 'yun. Halos may closure na 'yun."