Benjamin Alves at Derrick Monasterio, sabay na makiki-'TBATS' ngayong September 22

Ang dalawang Kapuso hunks na sina Benjamin Alves at Derrick Monasterio ang dadagdag sa kulitan at harutan sa The Boobay and Tekla Show (TBATS) ngayong Linggo, September 22.

Si Benjamin ang makakasama nina Boobay at Tekla sa 'Pranking in Tandem' segment. Ang biktima ng kanilang panggu-good time, dalawang nag-a-apply sa position bilang isang 'alalay.” Samantala, nagbabalik-TBATS muli si Derrick. This time, haharap siya sa naughty questions ng bagong segment na 'Blind Item.'

Maliban sa Kapuso hunks, highlight din sa episode na ito ang 'The Tekla Lookalike Contest.' Sa hindi inaasahang pangyayari, may tatlong Tekla-wannabes at sila'y maglalaban-laban sa panggagaya kay Tekla.

Nagbabalik din ang Kapuso Mo, Jessica Soho parody na may kuwentong 'Tiis Ganda,' at ang paboritong segment ng mga Kapuso sa kalsada, ang 'TBATS on the Street.'

Tuloy-tuloy ang laugh trip dito! Tutok na sa The Boobay and Tekla Show ngayong Linggo, September 22, pagkatapos ng Kapuso Mo, Jessica Soho!