Marian Rivera prepares, designs all floral arrangements for new biz Flora Vida

Nagbukas na sa publiko ngayong Martes, April 18, ang Flora Vida: Perennial Blooms by Marian, ang bagong business venture ng Kapuso Primetime Queen at “Tadhana” star na si Marian Rivera.

Paglalarawan ng aktres sa Flora Vida, “Flora Vida by Marian is an online flower shop specializing in preserved flower arrangements. I personally prepared and designed all flower arrangements."

Dagdag pa niya, “100% naturally preserved flowers” ang kaniyang gamit, at maaari itong magtagal hanggang dalawang taon kung maaalagaan nang mabuti.

Upang magtagal ang mga bulaklak, payo ni Marian, “Place the flower arrangement in a cool place; Avoid contact with water; Avoid exposure to direct heat and sunlight; Avoid high humidity environment."

Habang nasa soft opening pa lamang ang kaniyang negosyo, tatanggap ng orders ang aktres mula ngayong araw hanggang sa susunod ng linggo, April 28, at muli sa darating na May 17.

Makikita ang mga disenyong maaaring bilhin sa Instagram account na @floravidabymarian.

Hindi lingid sa kaalaman ng marami na hilig ng aktres ang mga bulaklak at flower arrangement, kaya naman labis ang kaniyang ligaya nang mabigyan siya ng pagkakataong gawin itong isang business venture. 

Matatandaang nagtungo pa ang Kapuso host-actress sa Japan nitong nakaraang buwan upang dumalo sa flower arrangement lessons, kabilang ang isang klaseng pinangungunahan ng Danish floral artist na si Nicolai Bergmann, isa sa top florists mula sa nasabing bansa. 

Sa naunang pahayag, sinabi ni Marian na magiging hands-on siya sa pagpapatakbo ng kaniyang negosyo.

Aniya, “’Yung gagawin kong arrangements, ako mismo ang gagawa. Walang ibang taong gagawa nito.... Ako lahat—ang magde-design, mamimili ng kulay, gagawa ng arrangement. Ako lahat.”

LOOK: Take a sneak peek at Marian Rivera's fabulous Flora Vida office

—Bianca Rose Dabu/KG, GMA News